KUCHING, 17 Sept: Premier Sarawak Datuk Patinggi Abang Johari Tun Openg ngasaika pemujur program Bejalai Ngelala Borneo empai lama ngemataka timbal ke chukup manah ari rayat Sarawak enggau Sabah.
Ku iya, tu mandangka rayat di kededua nengeri nya ngembuan basa ke chukup tinggi ngagai Yang di-Pertuan Agong ti nyadi penyaga undang-undang sereta nyadi lambang penyerakup rayat pupu basa, pengarap enggau budaya.
“Anang mih kitai enda ingat iya nya penegap ke bisi diatu dibaruh iring Perintah Penyerakup endang asil ari pemintar Seri Paduka Baginda Yang di-Pertuan Agong mutarka penanggul politik menua suba.
“Nya alai, anang mih kitai ngelebu pengandal iya tang rayat patut segulai sejalai nempa Malaysia lebih kering sereta pegari. Aku ngarap amat enggau besampi ngambika penegap tu beretan nyentuk Pengawa Bepilih Besai (PRU) deka datai,” ku iya.
Abang Johari mansutka jaku nya rambau Pengerami Ngintu Hari Malaysia 2023 Renggat Nasional ba Stadium Perpaduan, ditu malam tadi.
Ungkup penemu, Program Bejalai Ngelala Borneo udah ngemataka Yang di-Pertuan Agong Al-Sultan Abdullah Ri’ayattuddin Al-Mustafa Billah Shah enggau Raja Permaisuri Tunku Azizah Aminah Maimunah Iskandariah besereta raban diraja neresa pejalai penyauh 2,154 kilometer berengkah ari Tawau, Sabah kena 3 September enggau nembuka pejalai ba Telok Melano kena 13 September tu tadi.-TVS
