DEBAK, 16 Sept: Pengawa ngatur Konsert Cinta Merdeka nyerumba ngintu Hari Malaysia enggau Pesta Debak 2023 nyadi sejarah baru ngagai menua Betong lebih agi Pelilih Mit Debak.
Sapit Menteri Pemansang Indu, Nembiak Mit enggau Komuniti Sarawak Mohd Razi Sitam madahka program ke diatur begulai enggau raban RTM nya keterubah diatur ba bagi menua betong lalu pelilih mit debak dipilih nyadika palan program serak tu.
“Konsert Cinta Merdeka tu keterubah diatur ba bagi menua Betong iya nya ba Pelilih Mit Debak beserimbai enggau Pesta Debak 2023 lalu tu nyadi siti sejarah mujur ditempa ba Pelilih Debak sereta menua Betong laban sida RTM udah milih palan tu endur sida ngatur Konsert Cinta Merdeka nyerumba Hari Malaysia,” ku iya.
Razi ke mega Kaban Kunsil Nengeri (ADUN) Saribas madah munyi nya maya dirandau TVS ba rumah iya empu ditu malam tadi.
Udah nya, Razi nesau perayat ke diau besemak dikearap sama sampal datai enggau ngerichah ke agi Pesta Debak 2023 seraya beperindang enggau Konsert Cinta Merdeka.
“Aku nesau mensia mayuh ukai semina di Debak aja tang ari Betong, Spaoh, Pusa enggau Saratok aram sampal datai enggau kami Debak ngerichahka agi Konsert Cinta Merdeka.
“Malam tu bisi diatur akviti nyabut tiket benasip ti nyendiaka perais ke chukup manah ngagai bala sida ke bidik,” ku terang iya.
Ungkup penerang, entara penanyi ke bisi dikanggau khas merindang malam tu legi iya nya Acong Sweetchild, penanyi veteran dangdut Amelina, Azie Mustapha ke tebilang enggau lagu ‘Pelamin Anganku Musnah’ sereta deka diperindang penanyi tebilang Iban iya nya Lucy M, Candy Dylam enggau ke bukai.-TVS
