DEBAK, 16 Sept: Pemidang Kaban Kunsil Nengeri (ADUN) Jepak niang Datuk Talip Zulpilip, 72 taun siti pengelenyau besai ngagai nengeri Sarawak nyengkaum Parti Pesaka Bumiputera Bersatu Sarawak (PBB), ku Mohd Razi Sitam.
Sapit Menteri Pemansang Indu, Nembiak Mit enggau Komuniti Sarawak nya madah niang ukai semina mayuh jasa ngagai pemansang politik tang mega ngagai pemansang ekonomi di Sarawak sekumbang nyadi Chairman Opis Pemansang Ekonomi Sarawak (SEDC) sebedau tu.
“Kitai chukup berasai sinu enggau pemidang niang lalu tu siti pengelenyau besai ngagai Sarawak.
“Niang mayuh jasa ngagai Sarawak ukai semina ngagai pemansang politik tang ngagai pemansang bidang ekonomi laban ke lama nyadi Chairman SEDC.
“Kelimpah ari nya, niang mega kala mangku bemacham pengawa (portfolio) bukai sebedau tu enggau nya aku ngenatai ke penyinu ati nuju sida sebilik lalu asai ba aku baka tuai Parti PBB ke bukai mega bela ngasai pengelenyau niang tu,” ku iya.
Razi ke mega tuai Parti Pesaka Bumiputera Bersatu (PBB) pampang Saribas madah munyi nya lebuh dirandau TVS di rumah empu di Debak, malam tadi.
Nangkan ke nya, Razi madah niang siku ketuai ke chukup mentas sereta enda amu enggau penemu.
“Niang siku ketuai ti mentas sereta nyamai enggau begulai lalu enda amu bekunsi ke penemu diri.
“Pekara ke pemadu dikeingatka aku kenyau begulai dalam dunya politik, niang entara pemesai ba Sarawak selalu meri semangat meri jaku lalau, ngajar anang leju ngetan ke parti sereta anang enda seruran nyaga menua enggau manah.
“Udah nya, niang mesan anang anang enda siru enggau rayat ke dipegai diri empu,” ku iya.
Niang ke mega ex-Menteri ba Opis Kepala Menteri Sarawak (Integriti enggau Ombudsman) diripotka udah nadai urung pukul 6 lemai kemari ba Palan Pakar Perubat Normah ketegal napi penanggul pengerai tungkul ati, tungkul sengayuh enggau darah tinggi.-TVS
