MIRI, 10 Sept: Yang di-Pertuan Agong Al-Sultan Abdullah Ri’ayatuddin Al-Mustafa Billah Shah sehari tu tadi bisi mesan rayat terus begulai manah sereta sama seati enggau pangan diri.
Al-Sultan Abdullah mansutka jaku nya sebedau bekejang ninggalka palan Pengerami Begulai enggau Rayat di Pantai Bungai, Bekenu, di Miri nyerumba Program Bejalai Ngelala Borneo.
“Diau manah-manah, lantang senang enggau sama seati. Patut sukung perintah atas (pangau) tu, senang deka ngatur pemansang enggau terus maju.”
“Aku enggai bejakuka politik. Aku semina deka bejakuka pasal pengasih aja. Aku Agong ngagai rayat Sabah enggau Sarawak sereta semua. Patut sama seati, nyaup pangan diri,” ku iya.
Raja Permaisuri Agong Tunku Azizah Aminah Maimunah Iskandariah mega sama enggau bekejang ninggalka palan pengerami nya ti nyadi sebagi ari tusun program ba Hari Kelapan nyerumba Program Bejalai Ngelala Borneo.
Sama bisi nyereta pejalai nya Pemangku Raja Pahang Tengku Hassanal Ibrahim Alam Shah Al-Sultan Abdullah Ri’ayatuddin Al-Mustafa Billah Shah, Tengku Panglima Raja Kolonel Tengku Amir Nasser Ibrahim Shah enggau paduka anakanda Tengku Ahmad Ismail Mu’adzam Shah. – TVS
