DEBAK, 6 Sept: Urung 5,000 iku temuai disadang datai ngerichahka Pesta Debak 2023 ti deka diatur berengkah 14 nyentuk 17 September tu.
Sapit Menteri Pemansang Indu, Nembiak Mit enggau Pengelantang Komuniti (KPWKK) Sarawak, Mohd Razi Sitam madah, Pesta Debak serak tu keterubah iya diatur begulai enggau Opis Radio Televisyen Malaysia (RTM) kuching.
“Pesta Debak deka diatur berengkah 14 nyentuk 17 September tu.
“Nya alai, kitai melabaka 5,000 iku temuai ari dalam enggau luar menua deka datai bepelasarka kupon ke udah dibeli,” ku iya.
Razi ke mega Kaban Kunsil Nengeri (ADUN) Saribas madah munyi nya ngagai TVS pengudah Pengawa Nyuaka Setipikit ngagai 76 penyereta Kelas Pelajar Literasi Fungsian (PLF) enggau Kelas Literasi Education for Adult Skills (LEADS) diatur ba Diwan Perpaduan ditu, pagi tadi.
Nangkan ke nya, Razi madah penyampau palan bedaja deka dibuka maya nya ila bisi 112 buah.
“Semua palan bedaja deka disedia maya nya ila bisi 112 buah tang naka tu iya ke udah diambu raban pedaja bisi 82 buah,” ku iya.
Udah nya, Razi madah nyerumba pengerami nya ila deka diatur Konsert Cinta Merdeka sereta deka dipancharka terus nengah RTM ari Debak.
“Pesta Debak serak tu kitai nguna konsep Pengerami Hari Malaysia ke deka diintu kenaka 16 September tu.
“Konsert Cinta Merdeka deka diatur kena malam 16 September dikemujurka 20 iku raban ari RTM sereta penanyi tebilang baka Amelina (penanyi dangdut), Lucy M, Acong (Sweet Child), Azie Mustapha, Candy Dylam, enggau ke bukai,” ku iya.
Razi mega madah maya nya bemacham aktiviti bisi diatur baka lumba rayat (gasing, batak tali, dart), mandangka ‘Live Band’, Pekit Karaoke Tebuka, main netbol, badminton, mandangka tanda asal, ngajat, pekit nyura nembiak enggau orang besai tuai sereta ke bukai.
Entara palan endur ngatur pengawa bemain sereta pekit tu baka Arena Gasing Debak, Riveria Sport Centre, Diwan Mellennia Debak enggau Tadika SEDIDIK Debak.
Sama bisi datai iya nya, Pegawai Kemas Bagi Betong, Jeffery Lana, Penulung Pegawai Nguasa Pelilih Mit Debak, Muhammad Hafiz Kepli, bala tuai raban bansa enggau ke bukai.-TVS
