SARATOK, 5 Sept: Kaban Kunsil Nengeri (ADUN) Krian Friday Belik ngelalau mensia mayuh lebih agi di Saratok patut mansik silik penatai sesebengkah isu tauka penanggul ti bisi nyadi ba menua nya sebedau ngerembaika isu nya ba media rama.
Ku iya, nengah pansik ti silik deka ngujungka pemacha tauka penguna media rama bukai bulih penerang ti nyemetak sereta betul.
“Aku ngarapka mensia mayuh anang kelalu jampat nyadung berita tauka gambar enti kita enda nemu batang cherita ti betul bekaul enggau siti-siti projek tauka siti-siti isu laban nya tau pulai ke penanggul ngagai diri empu,” ku iya.
Friday mansutka penemu nya ngagai TVS lebuh meri timbal bekaul enggau isu Projek Ngaga Jematan Nuju Rumah Panjai Beti enggau Sekula Primari (Sk) Ulu Awik ke dikemegau ba media rama sebedau ti tau bendar meri peragam ke enda manah ngagai raban ke bekaul.
Nangkan ke nya, ku iya ari berita ti betul ke disadung ba sebelah media rama nya mega ulih ngujungka agensi ke bekaul dikutuk mensia mayuh.
“Ambika banding baka (projek) jematan tu iya ukai diteju ngapa tang bisi pengawa ari agensi teknikal JKR ngerumban projek.
“Taja pia, penanggul ari raban kunteriktor…beduduk ari nya kitai enda ulih nyalahka sida JKR tauka pengari rayat,” ku iya.
Beduduk ari nya, Friday ngarapka mensia mayuh anang kelalu ngutuk pengari rayat laban sida pan naka ulih deka meda projek nya tembu enggau lengkas.
“Nya alai, badu mih nyalah ke sapa-sapa sereta ngerembaika berita ke enda patut laban nya tau meri empas ke enda manah,” ku terang iya.-TVS
