SARATOK, 5 Sept: Penanggul ari kunteriktor ngujungka Projek Ngaga Jematan Nuju Rumah Panjai Beti enggau Sekula Primari (SK) Ulu Awik di Saratok tejanggal.
Kaban Kunsil Nengeri (ADUN) Krian Friday Belik madah, surat pemendar bejalaika pengawa udah dikeluarka ngagai kunteriktor sepengudah proses chabut undi tembu ba bulan March suba.
“Ngelansa pasal projek Jematan Nuju Rumah Beti enggau SK Ulu Awik kebendar iya jematan tu udah bisi agih belanja RM100, 000.
“Kunteriktor mega udah dipilih nengah chara chabut undi ba bulan March 2023 tang sida lalu enda belabuh ngereja pengawa.
“Nya alai, nyentuk haribulan (timpuh projek) patut tembu kena 5 September tang nadai sebarang pengawa udah dikereja naka ke diatu,” ku iya.
Friday mansutka penerang nya ngagai TVS pengudah ngabas taba Projek Ngaga Jematan Nuju Rumah Panjai Beti enggau Sekula Primari (SK) Ulu Awik ditu, kemari.
Tandu Friday, nitih penerang ari Opis Kereja Raya (JKR) ke nyadi agensi pengemata projek kunteriktor ke dichiri udah diberi notis sereta dikangau baum tang nadai sebarang asil.
“Nya alai aku mai bala JKR meresa lalu deka ninga penerang ari sida JKR empu kebuah projek tu tejanggal.
“Sepengudah ninga penerang ari sida nyata penanggul nya endang ari kunteriktor nya empu,” ku iya.
Bekau ari nya, Friday madah sebaka enggau polisi ungkup bala kunteriktor bukai mega sida ke puntan nembuka projek udah diberi tangkan sereta deka dikinsil bejalaika projek.
“Reti nya, kunteriktor ke lama deka ditukar ngambika kunteriktor baru ulih bejalaika pengawa ke patut,” ku iya.
Ungkup penerang, Projek Ngaga Jematan Nuju Rumah Panjai Beti enggau Sekula Primari (SK) Ulu Awik enti nitih patut udah tembu kena 5 September 2023 tang naka diatu projek nya agi mengkang nadai bejalai.
Sama bisi datai nyempulang pejalai ADUN Krian ngabas taba projek jematan ke tejanggal tu dua injinir ari Opis Kereja Raya (JKR) Betong enggau Saratok, Dayang Nurashreen Muneera enggau Khairil Nidzam sereta ke bukai.-TVS
