SARATOK, 4 Sept: Pekit pemanah bunyi enggau gaya burung udah tu deka diatur ninting taun di Saratok, ku Mohd Duri.
Kaban Kunsil Nengeri (ADUN) Kalaka nya madah, pemutus nya digaga berindik ari sambut enggau timbal ti chukup manah diterima ari raban penginang burung di menua tu genap kali pekit nya diatur ngelama tu.
“Program tu keempat kali pekit udah diatur Gerempung Pekicau Saratok nyadi sambut iya chukup manah ari selampur menua baka ari Kuching, Bintulu, Sibu, Sri Aman, Debak enggau ari Saratok.
“Beduduk ari nya, aku setuju Pekit Bunyi enggau Gaya Burung tu diatur ninting taun ditu,” ku iya.
Mohd Duri madah munyi nya lebuh dirandau TVS sepengudah tembu bejadika Pekit Pemanah Bunyi enggau Gaya Burung Tebuka Saratok Ddiatur Gerempung Pekicau Saratok (KPBS) ba Arena Petanque Saratok, kemari.
Nambah nya ku iya, ari pekit nya ke suah diatur jemah mega ulih nyadi siti pematak penatai temuai, ngerapat ke kaul enggau pangan diri sereta ulih mega nyadi siti pelasar dikena pedagang mit di saratok nambah ke penatai pemisi sida.
“Sida tu iya nya orang ke endang rindu ke munyi burung lalu bekerejasama enggau SFC lalu bisi permit mega enggau minat nya mega seriris enggau niat Perintah ti deka nyaga semua utai idup (unggas) di menua tu.
“Ari pekit tu ila jemah mega ulih dikena ngerapat ke kaul mensia mayuh ditu kelimpah ulih mega nyadi ke pelasar raban pedagang mit ditu nambah ke penatai pemisi,”ku iya.
Ungkup penemu, pekit pemanah bunyi enggau gaya burung serak tu dipasuk lima bengkah kelab ari Kuching, Samarahan, Simanggang enggau ari Bintulu ke bisi nganjung tiga iti tim.
Pekit serak tu mega keterubah iya nguna servis akim ari Indonesia.
Sama bisi datai, Tuai Seksyen Penerit Adat enggau Penyaga, Sarawak Forestry Corporation Kuching, David Mohamed, Chairman Gerempung Kelab Pekicau Saratok, Haji Kiprawi Haji Terang, tuai-tuai raban bansa enggau ke bukai.-TVS
