DARO, 4 Sept: Perintah Sarawak komited mutarka penanggul bekal di Daro ke agi ditapi sekeda peranak menua nya.
Premier Sarawak, Datuk Patinggi Tan Sri Abang Johari Tun Openg madah, randau enggau Opis Menteri Utiliti enggau Telekomunikasyen Sarawak benung dipejalai nyengkaum perambu nguna teknologi baru dikena negapka sistem servis bekal ai beresi lebih agi ba endur ke tebunsa.
“Nyadi bekal ai tu kebendar iya kitai bisi penanggul pun penatai ai.
“Taja bisi tangki tang baka ni deka nganjung ai ngagai tangki.
“Nyadi kitai bisi chara baru ti deka dipadah aku.
“Aku agi berunding enggau Datuk Julaihi kitai ngena teknologi baru ungkup bekal ai lalu ai nu deka dipam ngambi laju niki ke tangki enggai ari tangki nya ari atas deka ngujungkai ai deras terus ngagai bala penguna,” ku iya.
Abang Johari mansutka pekara nya maya Bejadika Pengawa Nangguhka Pesta Daro 2023 enggau Pengawa Nyerahka Taba Projek Rayat Pelilih Daro, kemari.
Tandu iya, penanggul bekal ai nyadi pekara dikemeratka Perintah Sarawak laban perengkaguna pemun nya chukup beguna ngagai semua penguna nyengkaum raban pedagang.
“Kitai deka ngadu, mutarka penanggul ai laban sida ke bedagang pan begunaka ai, deka ngaga mee kolok pan mesti bisi ai.
“Nyadi tu pekara ke beguna patut kitai putar ungkup genturung pendiau enggau mega ngagai peranak rumah panjai,” ku terang iya.-TVS
