BETONG, 3 Sept: Sekeda tuai raban bansa di Betong bela ngaku sereta beterima kasih ngagai semua pemansang ke udah dikemujurka perintah kenyau ari menua Sarawak udah merdeka.
Maya dirandau TVS bekaul enggau pemansang udah digaga di Betong nyadi munyi tu ku penemu bala sida ;
Ku penemu Pemancha Norman Ngumbang Sandin ari jeman pegai Barisan Nasional (BN) ditampung Gabungan Parti Sarawak (GPS) ke diatu chukup mayuh ubah udah dibai perintah ungkup Betong.
Siti pemansang ke chukup nyata nguntungka perayat di menua dibaruh pegai iya, ku Pemancha Norman iya nya Skim Nanam Getah.
“Iya ke endang nyata bendar ke balat nguntungka kitai Iban lebuh maya keterubah-rubah suba dia aku meda perintah ke bisi numbuhka dikumbai kitai Skim Getah.
“Maya nya, temuda rimba kitai di rumah panjai mayuh endang nadai udah dikereja tang laban perintah ke chukup manah sida ngasuh ngemansangka nya nengah chara nyungkur semua tanah ungkup kami nanam getah.
“Pengudah semua pengawa nya tembu, terus diberi ngagai kami ke diau ba rumah panjai.
“Nyadi kami semina ngerejang getah nya aja,” ku iya.
Nya alai ku iya, pengawa nya diperati chukup mujur nyungkak penatai pemisi bala Iban ke diau ba rumah panjai.
Udah nya ba penemu Penghulu Stanley Ejau Erin, pemansang ari sukut telekomunikasyen enggau palan alai nembiak belajar chukup manah ba Betong enti dibanding enggau sebedau tu taja agi bisi ke patut ditambah manah.
“Baka aku ke udah dipaduka nyadi Penghulu dalam lima taun lebih sebedau nyadi Penghulu. Sebedau tu nyadi Tuai Rumah nyadi chukup terang ngemataka pengawa pemansang di Betong ditu chukup maju nyadi ngarapka utai nya makin maju dudi hari ila, “ku iya.
Enda tinggal mansutka penemu, Tuai Rumah Gabriel Spencer Sang ari Sungai Sibau Padeh madahka, pemansang ke chukup nyata iya meri pengelantang ngagai sida semenua iya nya pemansang datai jalai raya.
“Ari sukut ekonomi enti suba aku ngasaika enti baka kami di Ulu Padeh din di Sungai Sibau dalam kandang 10 taun, bebelas taun sebedau bisi jalai chukup pedis.
“Taja bebendar gawa tang mansutka asil nya pedis laban kami di Sungai Sibau di entigis ulu sungai.
“Kami maya nya tubah merau, semua dibai sigi ditepan ba belakang magang tang sepengudah datai jalai semua pengawa ke tusah belinsur nyamai,” ku iya.
Nya alai, semua sida bela beterima kasih ngagai perintah lalu ngarapka mayuh agi pemansang terus dipejalai dikena ngamatka juluk nengeri tu nyadi nengeri maju enggau bepenatai pemisi tinggi manggai taun 2030.-TVS
