BETONG, 2 Ogos: Kaban Kunsil Nengeri (ADUN) Krian Friday Belik nerima manah sereta nyukung penuh perambu perintah deka muka Kilang Nginjin Rampang Sawit di Saratok munyi ke udah dipadahka Premier Sarawak Datuk Patinggi Tan Sri Abang Johari Tun Openg apin lama.
Ku iya, penumbuh kilang nya dudi hari ulih nyendiaka pengawa puang ngagai perayat lebih agi raban rebak baru ti benung begigaka pengawa di Saratok.
“Tu siti utai ke baru, chukup manah laban sebedau tu rampang sawit tu semina dibuai kitai pia aja.
“Tang enti iya udah bisi kilang tu ila dia rampang sawit tu ila ulih diinjin nyadi ke pemakai jelu.
“Nya alai, siti ari pemanah nya tadi ulih ngurangka pengamah rampa menua lalu kedua, siti pengawa manah ulih muka peluang gawa ngagai bala kitai ba Saratok lebih agi bala nembiak ke benung begigaka kereja,” ku iya.
Friday madah munyi nya maya dirandau pengari TVS pengudah ngulu pengawa Bejadika Karnival Lumba Ensikal Layar (LCC) Renggat Ke-5 ba Gelanggang Futsal RTC Simpang Layar, kemari.
Kelimpah ari nya ku Friday, penatai pemisi pekebun mit sawit ba Saratok mega mega deka betambah laban ukai semina bepanggai ba asil rega bejual buah sawit aja nyadika penatai pemisi sida baka ngelama tu.
“Pia mega rampang sawit tu tadi tau dijual laban bisi rega.
“Kelimpah ari kitai ke semina ngarapka asil ari buah sawit nya alai tu siti utai ke manah taja kitai apin nemu ni gaya utai tu kebendar iya.
“Tang tu siti perambu enggau penemu ti chukup manah, abis nadai ulih ngangkat ke penatai pemisi kitai di Saratok lebih agi ngagai kitai ti bisi ngembuan kebun sawit.
“Nya alai terima kasih ke pemutus penemu YAB Premier Sarawak, terima kasih Perintah GPS,” ku iya.
Sebedau tu, Premier Sarawak bisi madahka siti kilang nginjin rampang sawit ungkup pemakai jelu ke beungkus RM35 juta deka dibuka ba Saratok ujung taun tu.-TVS
