KUCHING, 2 Sept: Konvensyen Parti Pesaka Bumiputera Bersatu (PBB) taun tu deka diatur ba empat bagi menua di nengeri tu, ku Datuk Patinggi Tan Sri Abang Johari Tun Openg.
Presiden PBB nya madah, empat bagi menua ke udah dipilih tu iya nya Kuching, Betong, Sibu enggau kepenudi ba Miri.
Abang Johari nerang konvensyen serak tu berambaika jaku ‘PBB Teras Kestabilan, Kemajuan dan Kemakmuran’ nyerumba Pengerami 60 Taun Sarawak Merdeka.
“Konvensyen tu deka diatur kena 23 September di Kuching, 8 Oktober di Betong, 29 Oktober di Sibu enggau 11 November di Miri sereta iya berambaika jaku PBB ‘Teras Kestabilan, Kemajuan Dan Kemakmuran Sarawak’,” ku iya.
Premier Sarawak mansutka pekara nya nengah aum pemberita pengudah betuaiaka Aum Supreme Kaunsil PBB Sarawak di Indu Opis PBB, ditu, kemari.
Nerang silik, iya madah konvensyen nya bisi kaul enggau atur Gabungan Parti Sarawak (GPS) iya nya PBB ke nyadi parti tulang belakang enggau ngemujurka polisi Strategi Pemansang Lepas COVID-19 (PCDS) 2030.
Kelimpah ari nya, ku Abang Johari, ,mya konvensyen nya ila mega bala kaban parti deka ngelala polisi ekonomi baru ke bepanggai ngagai kuasa ulih dikemaru enggau industri baru asil nguna kuasa nua.
“Keterubah iya nya bekaul enggau dagang karbon, kedua ekonomi hidrogen, ketiga ngenegapka agi rampa menua nengah ekonomi sekular ti ngemeratka atur tambah dalam ngaduka rampang uras nyadi kuasa,” ku iya. -TVS
