MUKAH, 31 Ogos: Sarawak terus nyingkang berani dalam ngerandang ekonomi baru ungkup pemansang dudi hari nuju juluk nyadi nengeri bepenatai pemisi tinggi enggau maju manggai taun 2030, ku Datuk Patinggi Tan Sri Abang Johari Tun Openg.
Premier Sarawak nya madah, pengeransing Perintah Sarawak dalam ngerandang ekonomi baru nya dipandangka nengah pejalai raban ke sekeda menua Eropah seraya belajarka sekeda pekara ke chukup beguna.
“Raban Perintah Sarawak diuluka aku ke Norway enggau United Kingdom (UK) beratika teknologi sereta undang-undang ngaul inisiatif Nangkap, Nguna enggau Nyimpan Karbon (CCUS) dedin.
“Di Sweden, kami bisi beratika industri kuasa ba menua nya ngaul pengawa nyadung kuasa neresa adan menua laban tu beguna ngagai Sarawak ke bisi penau nyadi enjadi pengeksport kuasa ngagai menua sepiak,” ku iya.
Iya madah munyi nya maya Pengerami Ngintu Hari Kebangsaan 2023 di Politeknik Mukah, sehari tu tadi.
Pengerami nya bela digulu Pemangku Tuai Pemegai Menua (TYT) Sarawak, Tan Sri Datuk Amar Mohamad Asfia Awang Nasar, Sapit Premier Sarawak, Datuk Amar Douglas Uggah Embas, Menteri Pemansang Indu, Anak Mit enggau Pengelantang Komuniti Sarawak, Dato Sri Fatimah Abdullah sereta Sapit Menteri Ekonomi, Datuk Hanifah Hajar Taib.
Lebuh bekunsi senetang penemuai nya, Abang Johari madah, delegit Perintah Sarawak mega bulih input nya Waste-To-Energy (WTE) ti seriris enggau pengawa mutarka sistem nganchurka uras kelebih nemban di Sarawak dikena ngasilka kuasa gadung.
Abang Johari madah, penetap politik enggau pengering perintah dibaruh iring Gabungan Parti Sarawak (GPS) udah meri ruang ngagai Sarawak nempa kuing tuju ke nyengenda ari sukut pemansang ekonomi, lebih agi nengah Strategi Pemansang Lepas COVID-19 (PCDS 2030).
“Kenyau 2017, Perintah Sarawak udah meranakka sepenyampau belanja ungkup pemansang digital, infrastruktur di mengeri enggau menua pesisir, orang gawa enggau pelajar, ngasilka kuasa ulih dikena baru, penyerta dalam sektor minyak enggau gas bidang-bidang baru lebih ekonomi gadung, ekonomi hidrogen, dagang karbon enggau CCUS.
“Semua tu betuju nyungkak ekonomi nengeri tu terus ngerembai enggau jampat ngagai tikas ke tinggi ngambi semua asil negeri betambah enggau rayat tau bulih pengawa sereta gaji ke besai,” ku iya. – TVS
