KABONG, 31 Ogos: Pemujur bulih surat pemendar berumah ba Skim Nangkir Genturung Pendiau (SPK) Hulu Kabong meri reti ke chukup besai ngagai mensia mayuh ke diau ba genturung pendiau nya.
Kebuah pia, pemisi SPK tu mantu peranak di kandang menua nya ngembuan rumah diri empu.
Lebuh dirandau TVS, siku penerima lot tanah SPK, Awang Ismail Awang Sahari, 31 madahka diri chukup betuah laban udah dipilih nyadi penyereta skim nya lalu besemaya deka nguna peluang nya enggau manah.
“Terima kasih ngagai perintah nengeri Sarawak laban udah meri lot ungkup kami ngaga rumah…udah tu aku deka ngentak rumah ungkup kami sebilik,” ku iya.
Udah nya, Syallipah Abdullah mega penerima SPK Hulu Kabong Fasa 1 madah diri meri besai terima kasih ngagai Tuhan laban udah dipilih nyadi siku penerima lot alai berumah.
Iya berasai gaga ati laban ngelama tu sida sebilik semina nyuwa lalu tu (SPK) endang utai dikearap sida.
Nangkan ke nya, ba penemu Ekeram Mohamad ke mega penyereta SPK Hulu Kabong Fasa 1 bela beterima kasih ngagai raban Opis Tanah enggau Survei laban udah ngemendarka peminta iya enggau chukup gaga bulih peminta nya dikena iya ngentak rumah baru enggau lengkas.
Ungkup penemu pengawa nyuaka surat pemendar berumah ba Skim Nangkir Genturung Pendiau (SPK) Hulu Kabong Renggat Keterubah ba Dewan Mayuh Guna Balai Polis Pelilih Kabong Kena Hari Dua tu tadi dikemujurka Kaban Kunsil Nengeri (ADUN) Kabong, Mohd Chee Kadir.
Sama bisi datai ngemataka pengawa nya, Penguasa Tanah enggau Survey Bagi Menua Betong, Morris Nayup, tuai-tuai opis perintah, tuai-tuai raban bansa enggau ke bukai.-TVS
