TUSUN 3 (Kepenudi)
Serunyut pemansang Betong ari perati tuai raban bansa
SIKU tuai raban bansa di bagi menua Betong, Pemancha Norman Ngumbang Sandin bisi bekunsi enggau TVS bekaul enggau gaya ubah lansa pemansang di sitak Betong sekumbang iya mangku pengawa nyadi tuai raban bansa Iban di Betong kenyau ari taun 2007.
Urung dua taun udah nya dalam taun 2010 dia aku dipaduka perintah mangku pengawa nyadi Penghulu megai sitak Layar Tengah.
“Aku nyadi Penghulu pengelama semilan taun lalu ba taun 2019 aku ditikika pangkat mangku pengawa nyadi Pemancha nyentuk ke diatu.
“Nya alai, aku udah mangku pengawa nyadi tuai raban bansa Iban megai Pelilih Betong dalam pengelama lima taun,” ku iya.
Sukut Sosio Ekonomi
Pemancha Norman madah sekumbang ke udah mangku pengawa nyadi ari tuai rumah, penghulu enggau pemancha dia iya meda gaya ubah menua lebih agi pemansang sosio ekonomi ba menua Betong.
Ku iya, diatu chukup jauh bendar berubah enti dibanding ari ke dulu suba lebih agi sepengudah menua Betong diserara ari Sri Aman enggau diangkat nyadi pelilih menua kediri sereta nyadi bagi menua penuh kena 26 March 2002.
“Berengkah ari nya dia pemansang tu majak mayuh dipeda aku.
“Pengawa perintah magi menua Betong tu kediri nyata amat nguntungka kitai Iban.
“Bekau ari nya, mayuh bengkah program bisi diatur perintah nyungkak sosio ekonomi perayat di menua Betong baka Skim Getah enggau ke bukai,” ku iya seraya muji atur perintah ke chukup manah ngagai rayat.
Kenu ku Pemancha Norman bansa getah ke diberi ngagai peranak rumah panjai maya nya endang bansa getah ke pelai.
Nya alai, chukup bulih bendar rayat belanja maya nya kelimpah perintah numbuhka RISDA lalu nyendiaka bemacham bantu ungkup raban pekebun getah.
“Aku deka meri terima kasih besai ngagai Perintah GPS tauka suba dikumbai BN laban udah mayuh mantu sereta kiruhka kami rayat,” ku iya.
Mayuh Pengawa Puang Tebuka
Lebuh ngelansa senentang pengawa puang tauka endur mensia mayuh ngiga penatai pemisi, dia Pemancha Norman madah diatu enda ga bangat tusah rayat deka ngiga belanja asal sida bagas gawa.
“Ambika banding palan endur begaga rumah chukup mayuh. Nyadi enda pedis endur orang ke landik betukang begigaka anak belanja,” ku iya.
Ngelansa pasal pemayuh mensia ke nedat Pasar Betong diatu, Pemancha Norman madah enti suba chukup pedis deka meda mensia tang diatu udah jauh berubah laban udah bisi Pasar Medan.
Pasar Betong diatu pan udah jauh maju enti peranak asal ditu lama enda pulai ke menua ambika banding urung 10 taun, nyema pulai ke Betong jangka aku tau tesat iya meda pasar Betong diatu.
“Kelimpah ari pasar, rumah ke digaga mega majak mayuh. Nyadi semua tu deka nyungkak ekonomi lebih agi raban sida ke mekuhka pengawa dagang,” ku iya.
Terang Pemancha Norman semua pemansang ke dipeda sehari tu asil ari pengeransing raban ketuai baka Kaban Kunsil Nengeri (ADUN) Layar Dato Gerald Rentap Jabu enggau apai iya Ex-Sapit Kepala Menteri Tan Sri Datuk Patinggi Alfred Jabu, Sapit Premier Sarawak Datuk Amar Douglas Uggah, Kaban Parlimen Betong Dr Richard Rapu enggau Ex-Kaban Parlimen Betong Datuk Lawson Robert Chuat enggau ke bukai.
“Sida tu mih ke udah mai pemansang ngagai menua kitai di Betong ditu,” ku iya.
Mayuh Palan Pelajar Ditumbuh
Diatu enda bangat tusah bala anak kitai lebih agi di Betong ditu deka ngiga palan endur nampung pelajar laban udah bisi Politeknik Metro, CENTEXS, Giatmara enggau MRSM.
“Aku ngarapka raban nembiak di Betong anang sesekali ngelepas peluang nampung pelajar nyema bisi kus ke setipak enggau minat sida.
“Nyamai amat nembiak diatu laban nadai kalat-kalat ke bukai enti deka nyambung pelajar ngagai tikas ke lebih tinggi,” ku iya.
Program Pemansang Betong
Dalam ngemujurka bemacham pemansang ke udah dilanggur ungkup Betong dia perintah bisi ngembuan siti komiti ke diberi nama Ejensi Pemansang Bagi Betong (BDDA) dikena ngemujurka projek besai ke udah dirintai sebedau tu.
Nya alai, Pemancha Norman ngelalau mensia mayuh anang sesekali ngelepas peluang ari bemacham program pemansang ke bisi dipejalaika perintah.
“Dunya diatu nuntut rayat anang sesekali ngelusu ngereja pengawa laban enti kitai enda nyengkau peluang ke disedia dia kitai deka majak tinggal sekalika nya ba pengawa bekebun tauka ke bukai,” ku iya.
Servis Telekomunikasyen Patut Dikemanah
Siku agi tuai raban bansa ari Betong, Penghulu Stanley Ejau Erin bela bisi mansutka timbal penemu ngagai TVS bekaul enggau lansa pemansang ke udah digaga perintah GPS di Betong.
Ku Penghulu Stanley sida ba Betong diatu kira ke chukup betuah laban tower komunikasyen didirika perintah nyau majak mayuh.
“Servis telekomunikasyen kami ditu seruran dikemanah raban ke bekaul nitihka peminta mensia mayuh, ambika chunto maya jeman dituntung penyakit Covid-19 suba chukup tusah nembiak ba sekeda endur belajar laban arus telekomunikasyen ke apin menyana.
“Diatu mega mayuh bala nembiak begunaka arus telekomunikasyen ke menyana dikena nembuka kereja sekula.
“Bisi sekeda nembiak ke datai ari menua nyau nurun ke Pasar Betong ketegal ti deka ngulihka arus telekomunikasyen ke menyana.
“Diatu aku ngarika perayat Betong minta semua pengurang ari sukut pengelubah arus telekomunikasyen patut dikemanah agi nengah chara nambahka tiang tower telekomunikasyen.
“Tu endang beguna amat laban nya entara perengkaguna ke pemadu beguna ngagai rayat lebih agi bala nembiak ke benung belajar,” ku tandu iya.
Penghulu Stanley madah diri udah manggai lima taun dipadu nyadi penghulu pengudah lama mangku pengawa nyadi tuai rumah.
Nya alai, diatu ku iya chukup berupai amat pemansang dibai Perintah GPS ngagai menua Betong lalu ngarapka Betong terus pegari nama baka bagi menua bukai ke udah dulu agi mansang.
Aktiviti Ekonomi Nyadi Lanchar
Bela enda tinggal mansutka timbal penemu ngagai TVS iya nya Tuai Rumah Gabriel Spencer Sang ari Sungai Sibau, Ulu Padeh.
Kenu ku Tr Gabriel dalam kandang 12 taun ke udah sekumbang iya udah nyadi tuai rumah dia iya beratika menua Betong chukup jampat berubah sekalika nya ari sukut infrastruktur pemun enggau ke bukai.
“Pemansang endang amat mayuh lalu diatu aku ngarapka bala pengari rayat patut lebih numpu ngagai pengawa ngemanah ke agi jalai alun nuju ngagai sesebengkah rumah panjai.
“Kebuah pia, agi bisi jalai bedau ditar dikena ngemudah ke agi raban ke nguna kerita mit. Kitai sama nemu ukai semua orang ulih meli kerita pikap,” ku iya.
Berebak enggau nya, Tr Gabriel mulaika kenang pemedis sebedau menua sida di Ulu Padeh, Sungai Sibau maya agi bedau datai jalai chukup merinsa sida semenua mansutka asil utai ke ditanam sida.
“Suba amat pedis ngereja pengawa maya apin datai jalai semua barang begunaka belakang ngema barang.
“Sepengudah datai jalai pengidup kami ba Sungai Sibau mupuk berubah, chukup nyamai kami ngereja aktiviti ekonomi.
“Tu empas ari pemansang ke udah dibai perintah ngagai menua kami di Betong ditu,” ku iya.-TVS
