SRI AMAN, 23 Ogos: Sekula Sekondari (SMK) Engkilili naka ulih ngetanka gelar champion Pekit Lumba Kaunsil Lumba Sekula Bagi Menua (MSSB) Sri Aman Renggat Ke-57 ke diatur berengkah 21 nyentuk 25 Ogos tu.
Siku Jurulatih Kontijen SMK Engkilili Gomez David Apat madah diri, sigi bebendar meransang raban atlit sida ngetanka gelar champion ungkup renggat serak tu laban nemu sekula bukai mega ngembuan pengering sereta penegar dikena ngerebut gelar champion.
“Kitai sama nemu semua tujuh buah sekula sekondari di Sri Aman ditu sama (deka champion).
Nya alai, kami (SMK Engkilili) taun nyin tadi kami udah champion taun tu deka ngetanka nya taja nemu sekula bukai pan mesti deka ngalah (ngerebut gelar champion).
Nya alai ‘keep the fight’ terus nguji mih,” ku iya seraya andal dalam 80 tauka 90 peratus SMK Engkilili agi ulih ngetanka gelar champion.
Pengajar Gomez madah munyi nya ngagai TVS nyerumba pengawa bejadika Pekit Olahraga Kaunsil Lumba Sekula Bagi Menua (MSSB) Sri Aman Renggat Ke-57 diatur ba Kompleks Lumba Sri Aman, ensana.
Pekit Lumba nya dipenyadika Sapit Menteri Pelajar, Inovasyen enggau Pemansang Bakat Sarawak Datuk Francis Harden Hollis.
Ungkup penemu bisi 987 iku atlit datai ari tujuh buah sekula sekondari ba sitak Sri Aman iya nya SMK Sri Aman, SMK Simanggang, SMK St. Luke, SMK Melugu, SMK Engkilili enggau SMK Lubok Antu enggau SMK Lingga ke mega nyadi tuai rumah pengatur pengerami bisi ngambi bagi ba Pekit Olaharaga MSSB Sri Aman serak tu.
Nangkan ke nya, bisi lapan bengkah zon ngarika sekula primari tauka kategori sekula baruh 12 taun bela bisi nganjung atlit iya ari Zon Engkilili, Zon Lubok Antu, Zon Lingga, Zon Pantu, Zon Sri Aman enggau Zon Skrang Undop, (SK) Abang Aing enggau SJKC Chuang Hua Simanggang.
Pekit Olahraga MSSB Sri Aman Ke-57 ngemataka keterubah dipasuk Sekula Pelajar Khas (PPKI) di Sri Aman ke bisi nganjung 47 iku atlit.-TVS
