SRI AMAN, 23 Ogos: Pekit Olahraga Kaunsil Lumba Sekula Bagi Menua (MSSB) ukai semina palan endur milih pengari ungkup pekit renggat nengeri aja tang kebendar dikena nempa runding, kreativiti enggau inovasyen raban nembiak.
Sapit Menteri Pelajar, Inovasyen enggau Pemansang Penau Sarawak, Datuk Francis Harden Hollis madah, pekara nya amat beguna dikena ngasilka modal mensia ke ngembuan chara berunding ke regas.
“Pekit tu ukai semina siti pekit endur kitai meda bakat anak kitai ke enggau bepekit tauka semina dikena milih pengari ngagai renggat nengeri tang lumba tu beguna bendar dikena nerenak pengeransing sida enggau kreativiti sereta inovasyen.
“Nya siti ari elemen ke pemadu beguna dikena nerenak chara berunding ikas tinggi ungkup modal mensia ke ulih besemekih ba tikas global,” ku iya.
Harden ke mega Kaban Kunsil Nengeri (ADUN) Simanggang madah munyi nya maya bejadika Pekit Olahraga Kaunsil Lumba Sekula Bagi Menua (MSSB) Sri Aman Ke-57 ba Kompleks Lumba Sri Aman, ensana.
Berebak enggau nya, Harden meransang bala apai indai patut terus meri sukung enggau peransang ngagai anak sida ngulihka pemujur ba pengawa lumba.
“Nuju kita ke apai indai, aku ngarapka kita ulih meri sukung penuh ngagai anak kita ngambi sida ulih chakah agi dalam kokurikulum.
“Kebuah pia laban penau sida ba kokurikulum ulih mantu sida bulih pemujur dalam bidang akademik,”ku tandu iya.
Udah nya, maya bejaku bejadika pengerami nya mega Harden besemaya deka agih belanja sepenyampau RM40, 000 ngagai Opis Pelajar Pelilih (PPD) Sri Aman ungkup guna kontijen lumba ari Sri Aman nyereta Pekit Olahraga Kaunsil Lumba Nengeri Sarawak ke deka diatur ba Miri dalam bulan September tu ila.
Sama bisi datai Pegawai Pelajar Pelilih Sri Aman, Haji Abdul Rahman Haji Muhi-Yuddin, Sapit Pegawai Pelajar Pelilih Sektor Pemansang Bakat Nembiak, Tubau Limbai ngarika Pegawai Pelajar Pelilih Lubok Antu sereta ke bukai.-TVS
