TUSUN 2
Perintah ransing nyungkak ekonomi rayat
KELIMPAH ari pekara pelajar pekara ekonomi antara pugu pemansang pemadu dikemeratka perintah besai enggau perintah nengeri dikena nyungkak pengidup rayat lebih agi di menua pesisir.
Ku Kaban Parlimen Betong, Dr Richard Rapu di menua Betong penatai pemisi rayat naka ke diatu lebih ngagai pengawa betanam betupi sereta bisi tiga komiti besai ke suah dikemeranka rayat mayuh baka lada, getah enggau sawit.
“Enti beratika tungga ke menua ulu tauka tanah tinggi di Betong sida lebih nemban nanam getah.
“Udah nya lada, kitai sama nemu Betong endang nyadi pengeluar lada putih ke pemadu bekualiti sereta produk ke bekaul,” ku iya maya Randau Eksklusif begulai enggau TVS, empai lama.
Nangkan ke nya, menua tungga ke ili iya nya menua ke ngembuan tanah malai sida dia mayuh agi nanam komoditi lada.
Ngelansa pasal pengawa nyual ku Dr Richard naka tu sigi nadai penanggul komiditi nya dijual asal lada nya bisi tetap bisi mega orang ti meli.
“Semua komoditi tu ulih dijual sebarang maya tang ba sawit rega komoditi tu suah berubah nitihka makit dunya,” ku iya.
Betanam Betupi Chara Moden
Taja pia beduduk ari dunya ke majak mansang ari sukut teknologi dia ngujungka kitai sigi meransang mensia mayuh besemekih ngerembaika agi bungkur pengawa betanam betupi.
“Reti nya, kitai enda tau ngandal siti komoditi aja. Kitai mesti nanam utai ke jampat mansutka asil baka sayur enggau ke bukai.
“Pengawa tu patut digembar enggau pengawa betanam chara moden tauka ngena teknologi laban kitai sama nemu nengah ekonomi digital dia semua pengawa dikereja deka nyadi mansang.
“Ambika chunto pengawa betanam nengah chara fertigasyen chukup jampat mansutka asil,” ku iya.
Udah nya, ku iya sida mega tau nguji betanam betupi nengah chara hidroponik. Semua tu endang pengawa betanam ngena teknologi baru.
“Arapka mensia mayuh lebih agi peranak rumah panjai anang takut belajar tauka ngambi bagi ngemeranka chara baru nya awakka sama ngasaika penguntung,” ku iya.
Diatu perintah enggai agi meri bantu nitihka chara lama. Ambika banding pengawa meri subsidi baja ngagai komuniti pengudah utai tanam nya dibaja lalu diteju pia aja lalu nadai asil ke nyengala dipeda.
“Nya alai, diatu kitai mesti berunding ke siti modul tauka strategi ke patut dikena,” ku iya seraya ngelansa maya jeman Datuk Amar Douglas Uggah agi megai Opis Menteri Betanam Betupi iya kala mantaika siti langgur penemu ke dikumbai ngena sebuah kompeni besai lalu dibai ngemansang Agropark.
Reti nya ku iya, perintah milih siti kompeni ke besai ke bisi teknologi enggau puku ke chukup sereta bisi pengelandik ari sukut logistik, nginjin enggau ngelakuka ngagai makit.
“Ambika chunto, baka pengawa ngemansangka buah nyiur. Dia kompeni nya tadi bisi pengelandik ari sukut nanam, sida mega bisi puku, sida bisi logistik lalu ulih ngumpul, meli, nginjin enggau mungkus ba renggat mata nyentuk nyadi produk ke ulih dijual ngagai makit.
“Ari ai nyiur nya tadi iya ulih digaga nyadi bemacham produk. Nya alai, pengawa baka tu enti siti kompeni nya mujur muka siti ladang ke besai, dia mensia mayuh tauka pekebun mit tentu deka nunda lalu ulih sama besaup nambahka asil komoditi ke dikemansang kompeni nya tadi,” ku iya.
Nya alai, pengujung iya kesatu raban pekebun mit tentu nadai irauka asil komoditi sida enda dibeli.
Udah nya kedua, sida ulih ngaga industri ba endur nya tadi lalu nambahka penatai pemisi rayat. Enti sida nyau mujur muka kilang lalu tu deka nyendiaka pengawa puang ngagai komuniti ke diau besemak.
Nya alai, enti model baka tu ulih dikemansangka kitai sangka aku empas iya amat besai lebih agi ngagai orang ke bisi tanah. Sida ulih nanam kediri tauka bekereja enggau kompeni ke bekaul,” ku iya.
Pengawa nya ulih dikemujur sekalika enggau kompeni peribit tauka ejensi perintah ke bekaul, ku iya seraya madah chukup setuju nyema langgur ke baka nya ulih dikemansang di Betong.
Kualiti Lada Betong Betikas Dunya
Produk lada ari menua Betong diatu udah dikelala ngembuan peminta tinggi ba makit menua luar laban ngembuan kualiti bekelas dunya.
Pekara tu diaku Tuai Program Agih Pemansang Orang Dagang Bumiputera (DUPB) Sarawak, Syed Yusof Syed Kechik ti madahka kualiti lada ari Betong endang digiga makit ari luar laban ngembuan standard ti dikedeka dunya.
“Kebendar produk ari Betong tu ngembuan kualiti lada ke endang digiga dunya.
“Nyadi kami ngasaika rugi enti enda ngambi peluang tu enti enda diguna enggau manah.
“Nya alai, aku berasai gagit maya Dr Richard Rapu deka begulai enggau kami sereta raban TERAJU ngemansangka agi produk-produk ari rumah panjai ngagai tikas entarabansa,” ku iya nengah ripot berita TVS sebedau tu.
Syed madah naka tu produk lada ari menua Betong mujur dijual ke Amerika Syarikat, Jipun, Jeddah, Arab Saudi enggau China.
“Naka tu kitai udah mujur ngerembaika produk-produk tu ngagai US ditangkan ke Jipun sereta bisi udah masuk ngagai sekeda supermakit di Jipun.
“Pia mega ba US, kitai udah bisi ba Amazon Online enggau ke bukai baka ba Wholemart di US.
“Nyadi dua agi makit ke deka dipasuk udah tu iya nya Arab Saudi di Jeddah.
“Kitai udah bisi di kedai. Produk-produk kitai enggau siti agi ba China kitai mega udah masuk nyadi chukup betuah laban nerima sukung ari Dr Richard,” ku iya.
Ku tandu Syed semua tu ketegal penyiru USM ti deka meda lalu ba jam ke sama deka ngangkatka genap produk di menua pesisir nengah inovasyen ke dikemisi sida.
Berebak enggau nya, lebuh ditanya bekaul enggau projek produk bukai ke bisi dipejalaika USM begulai enggau TERAJU, Syed Yusof madah ke jam diatu sida udah bejalai ke 10 iti projek di Betong lalu ba selampur Sarawak bisi enam iti.
Berebak enggau nya, Tuai Rumah Kelimbang Jaman ari Penyuluk, Ulu Layar maya dirandau TVS kala madah diri chukup gaga sereta chukup betuah laban rumah panjai sida dipilih endur bejalaika Projek Rumah Pengerangkai Lada Burak Solar.
Ku iya, enggau penembu palan nya ila deka ngemuntang ke agi pengawa sida serumah maya ngintu lada burak laban udah ngena chara moden.
“Aku ngarika kami serumah 32 pintu di Penyuluk ditu berasai gaga laban kami di Penyuluk ditu semua majoriti endang bekebun lada lalu kami udah diberi peluang ngemansangka pengawa ngintu lada ngena chara moden,” ku iya.
Berebak enggau nya, iya ngarapka projek nya terus mujur dikena meri peransang ngagai sida serumah terus ngemansangka pengawa bekebun lada.
“Kami udah tu deka bebendar agi nguji ngangkatka asil kualiti lada di rumah panjai seraya ngangkatka nama nengeri Sarawak ngagai tikas ke lebih tinggi,” ku iya.
Palan Nugung Produk Pemakai
Lebuh dipinta nerang senentang projek Palan Ngumpul, Nginjin enggau Ngemakit (CPPC) Betong, dia Dr Richard madah projek nya benung digaga enda jauh ari Padang Bilun Menasan Pandak Bebuling di Spaoh.
Projek CPPC dikemansangka Kaunsil Pemansang Koridor Wilayah (RECODA) nengah agih belanja sepenyampau RM10 juta.
“Sida iya ngaga CPPC ungkup produk pemakai di bagi menua Betong.
“Enti nitihka perambu projek tu digaga tembu dalam bulan April taun baru,” ku iya.
Nya sebagi ari perengkaguna ke chukup manah dikena ngangkatka industri betanam betupi di bagi menua Betong.
Tuju kitai endang deka ngerembaika agi makit produk ari Betong ngambika ulih dijual ngagai menua luar, ku iya.
Umbas Nitih Chara Lama
Diatu komuniti ke diau ba rumah panjai ti agi mekuh pengawa betanam betupi dilalau awakka sama mupuk ngetu ngena chara lama tang berubah nitihka model chara betanam ngena chara ke moden.
Sida tau mupuk bekerejasama ngiga siti kompeni ke ulih mantu ngangkatka ekonomi peranak rumah panjai.
Ari nya tadi, asil ari produk ke mujur dikeluar sida ulih ngerembaika makit produk nya dijual ngagai makit antarabansa sekali ngagai Singapore nengah STATOS tauka ngagai menua bukai baka Brunei.
Nya alai, semua perambu tu tentu nadai penanggul dikereja enti bisi bantu ari kereban teknologi ke baru dibai kompeni ke endang mayuh puku, ku iya.
“Siti agi konsep ba pengawa betupi ke udah dikereja iya nya kitai bisi nupi manuk penakan kampung. Tu beduduk ari mayuh peminta ari pemeli dibanding enggau manuk dagin.
“Nya alai, bisi udah diuji kami nguji nupi manuk indu lalu mujur mansutka purih manuk penakan.
“Manuk tu dilepas lalu enda dikurung aja. Ari sukut pemakai iya mega, manuk tu enda makai utai ngapa iya bisi disedia enggau pemakai jagung manis.
“Kitai di Betong udah bisi nyendiaka pemakai jelu tu, kelimpah ari repu jabang,” ku iya.
Nya alai, barang sapa ke bisi tanah anang enda nguji nanam pemakai ke dipakai manuk tu dulu ngambika lebuh deka nupi manuk ila, sida nadai kiruh bebelika pemakai manuk laban udah bisi pemakai manuk ke ditanam diri empu, ku iya.
“Reti nya, manuk ulih lepau ngapa lalu bulih pemakai enggau pechuma,” ku iya.
Kuta Bukit Sadok Produk Dagang Temuai Baru Betong
Sebaka enggau menua bukai ba Sarawak dia bagi menua Betong mega kaya enggau palan sejarah ke bisi penau dikena matak temuai.
Beduduk ari mayuh produk mit mayuh ti diperati bedau ulih matak temuai enggau meruan (enda putus) diatu perintah nengeri setuju ngangkat manah kuta Rentap di Bukit Sadok ngambika ulih dikena matak penatai temuai ke Betong.
“Projek ngemanah kuta Bukit Sadok nya udah dikemendar lalu diatu dalam perambu deka nyendiaka perengkaguna baka jalai ke menyana dikena ngelawa palan nya.
“Enti jalai tu udah meruan nyadi bala temuai ari dalam enggau ari luar bela nyamai deka ngelawa palan besejarah nya,” ku terang Dr Richard.
Sapit Premier Sarawak Datuk Amar Douglas Uggah Embas maya bejaku ba sebengkah program di Penom, Ulu Paku Spaoh madah projek Kuta Bukit Sadok tu deka berengkah dalam taun tu sereta ditaga tembu dalam timpuh dua taun.
Uggah madah, agih belanja sepenyampau RM16 juta ke dikemendar ungkup projek tu deka dikena ngemanah jalai ari Simpang Jambu nuju ke Bukit Sadok.
Ungkup penemu, Bukit Sadok ngembuan 2,091 meter tauka 6,863 kaki peninggi sebengkah palan endur Bujang Berani Iban ke benama Rentap ngetan diri ari diserang raban soldadu ti nanahka Rajah Charles Brooke kelia.-TVS
Betampung
