SEBUYAU, 18 Ogos: Perintah Sarawak merambu deka numbuhka Kaunsil Pelilih Sebuyau dikena nangkup penyampau rayat ke majak nambah diumba pelilih nya ke majak mansang.
Premier Sarawak Datuk Patinggi Tan Sri Abang Johari Tun Openg madah, pelilih nya patut ditumbuh seriris enggau penambah pegawai pelilih, pegawai admin sereta kaunselor.
“Ukai nya aja, bisi 325 lot rumah enggau 214 buah lot kedai sereta Klinik Pengerai Sebuyau baru deka dipenyadi udah tu ila,” ku iya maya Pengawa Bejadika Masjid Baru Sebuyau ditu, ngalihari tadi.
Berebak enggau nya, Abang Johari meri nama baru ngagai masjid nya nyadi Masjid Al-Muflihin digaga enggau dipelanja penuh Perintah Sarawak nguna agih RM10.858 juta.
Masjid baru nya digaga ba tanah 715 hektar berengkah 2015 lalu tembu taun 2022.
Sama bisi datai ngulu pengawa tu Sekretari Perintah Sarawak Datuk Amar Mohamad Abu Bakar Marzuki, Sapit Menteri Utiliti enggau Telekomunikasi Sarawak Datuk Dr Abdul Rahman Junaidi, Sapit Menteri Kuasa enggau Pemeruan Rampa Menua Sarawak Dr Hazland Abang Hipni, ADUN Lingga Dayang Noorazah Awang Sohor enggau Tuai Dipebasa Kaunsil Islam Sarawak Datuk Misnu Taha. – TVS
