DEBAK, 16 Ogos : Perintah Besai dikearapka ngemujurka enggau lengkas peminta Sarawak ti keranka pekara autonomi pelajar nengah Sempekat Malaysia 1963 (MA63) dipulaika baru.
Sapit Menteri Pemansang Indu, Nembiak Mit enggau Pengelantang Komuniti, Mohd Razi Sitam pekara beguna bendar dikemujur lengkas dikena nentuka Perintah Sarawak muntang agi ngatur projek ke ngaul sekula repuk.
“Sarawak antara nengeri ke pemadu mansutka asil ngagai Perintah Besai.
“Nya kebuah pemutus ke digaga Premier Sarawak Datuk Patinggi Tan Sri Abang Johari Tun Openg bekaul enggau autonomi nya chukup beguna ngambika sebarang projek pemansang ba sekula ulih lengkas agi dikemujur.
“Arapka Perintah Besai ulih ngerumban mutarka peminta Sarawak ba senentang MA63 tu,” ku iya.
Razi ke mega Kaban Kaunsil Nengeri (ADUN) Saribas mansutka pekara nya pengudah tembu Pengawa Nyuaka Insentif ngagai Ex-Nembiak Sekula Sekondari (SMK) Saribas ke nyulut ba pemutus peresa Setipikit Tinggi Pelajar Malaysia (STPM) enggau Setipikit Pelajar Malaysia (SPM) taun 2022 di Diwan Millenea ditu, kemari.
Nangkan ke nya, Razi madahka ari pemujur minta autonomi nya nya ila mega tentu deka meri empas sereta peluang ngagai Sarawak ngatur tauka bejalaika projek pemansang ba bidang pelajar enggau pengerai.
“Nya kebuah ba Sempekat MA63 kitai enggau naka ulih minta autonomi dalam bidang pelajar enggau pengerai tu diberi pulai ngagai Sarawak laban enggau pemujur autonomi nya diberi ngagai kitai deka ngemuntang tauka ngemudahka Sarawak ngatur projek pemansang ba dua bengkah bidang tu,” ku iya.
Sama bisi datai Kunsil Pelilih Mit (SAO) Debak, Mohd Hafiz Kepli, Prinsipal SMK Saribas, Mohd Lela Alamshah enggau ke bukai.-TVS
