DEBAK, 16 Ogos: Sekeda perayat Debak mantaika pengaga ati sepengudah lama nganti diatu mesin ATM ke diining sida udah bisi disedia ba Pasar Debak.
Siku perayat Debak ke mega udah pinchin, Roslan Ramli, 47 madah diri endang lama udah ngining deka bisi mesin ATM baka pasar bukai.
“Diatu lantang ga ati meda udah bisi mesin ATM tu. Perengkaguna baka (ATM) tu mih ke dianti-anti kami ngelama tu,” ku iya.
Udah nya, ku sigi perayat Abang Akim Abang Ahmad Hamzah, 56 madah terima kasih ngagai perintah enggau pengari rayat ke udah mantu minta perengkaguna tu.
“Manah amat udah bisi perengkaguna tu. Nyadi terima kasih ngagai YB (Pengari rayat) enggau perintah,” ku iya.
Berebak enggau nya Akim ngarapka mensia mayuh bela nguna perengkaguna nya enggau manah.
“Arapka semua kitai bela nguna perengka tu enggau manah, anang ngerusak iya,” ku lalau iya.
Sida mansutka penemu maya dirandau TVS maya pengawa ngabas mesin ATM ke baru dibuka ba Pasar Debak, kemari.
Pengawa nya bela digulu Kaban Kunsil Nengeri (ADUN) Saribas Mohd Razi Sitam.-TVS
