KUCHING, 10 Ogos: Pengawa nguburka Bujang Berani menua, Mejar KM (B) Michael Riman Bugat ke midang kena Hari Satu tu tadi, udah dipejalaika enggau lanchar ba Pendam Bujang Berani Kuching pukul 10.30 pagi tadi.
Michael, 71, asal ari Saribas, midang pukul 9 pagi ba Sepital Besai Sarawak (HUS) ketegal penyakit tunggul sengayuh.
Pengawa beradat nguburka niang dikemataka urung 200 iku orang nyengkaum kaban belayan ke semak enggau bala bakih niang seraya meri basa kepenudi.
Bela datai Sapit Sekretari Perintah Sarawak (Administrasyen), Datu Buckland Bangik, Panglima Divisyen Satu Infantri Malaysia (1 Divisyen), Mejar Jeneral Hassan Embong, Tuai Direktor Opis Pekara  Veteran ATM, Mejar Jeneral Zambery Jefry Haji Darus, Sapit Kepala Polis Sarawak Dato Mancha Ata, penerima pingat Seri Pahlawan Gagah Perkasa, Lt. Jeneral Datuk Sri Panglima Zaini Mohd Said enggau Jen (B) Datuk Stephen Mundaw sereta Raban Soldadu Darat Malaysia, Gerempung Veteran Sarawak Renjer.
Pendam niang berimbai enggau bujang berani, niang DSP Michael Padel enggau kah bujang berani Iban, niang Temenggong Datuk Kanang Anak Langkau.
Niang antara penerima pingat Panglima Gagah Berani kena 6 June 1984.
Berengkah nerima latih nyadi Soldadu Darat kena 22 June 1973, iya udah nya dipasuk nyereta raban keterubah Batalion Kelapan Rejimen Renjer Diraja (RRD) di Kem Terendak, Melaka enggau nyereta Platun Kilat tauka Platun Ngalaban.
Udah nya, niang mega kala nyereta sekeda pengawa perang kena 9 Oktober 1976 di Kampung Serangan, Lundu, Sarawak enggau kena 26 Disember 1977 di Gopeng, Perak.
Ba kededua operasyen nya, niang mujur bedengah dua orang raban penyelawai komunis. – TVS
