KUCHING, 6 Ogos: Mengeri kuching malam tadi richah laban program Kuching Street Parade 2023.
Program nya diatur beserimbai enggau Ngintu 60 Taun Sarawak Merdeka.
Taun tu, bisi 60 buah kontinjen ngambi bagi lalu penyampau semua sida urung 2,400 iku penyereta.
Travilion Commercial Centre nyadi palan endur berengkah pengawa bejalai beraban nya pengudah ‘Flag Off’ dipenyadika Sapit Menteri Dagang Temuai, Kreatif Industri enggau Seni Pemerindang Sarawak, Datuk Sebastian Ting.
Raban kontinjen terus bejalai lalu ngetu meri basa ba mua panggau besai ti dikemataka Sapit Premier Sarawak, Dato Sri Dr Sim Kui Hian ngarika Premier Sarawak, Datuk Patinggi Tan Sri Abang Johari Tun Openg.
Pengawa bejalai beraban nya tembu ba mua begunan Opis Pos Besai berimbai enggau Padang Merdeka, Kuching urung 2.5 kilometer itu.
Pengudah tembu pejalai semua kontinjen dia mengeri kuching sekali richah enggau pengawa madangka bungai api.
Antara kontinjen ke bisi ngambi bagi baka komuniti genturung pendiau, komiti pemansang enggau pengelikun genturung pendiau, raban pancaragam sekula sekondari, opis-opis perintah, gerempung ukai dikuasa perintah (NGO), palan pelajar tinggi enggau ke bukai.-TVS
