SARATOK, 3 Ogos: Kemaya hari tu Pelajar Sains, Teknologi, Injiniring enggau Matematik sereta Pelajar Teknikal enggau Latih Vokasinoal (TVET) chukup beguna dikena nangkup peminta industri.
Kaban Kunsil Nengeri (ADUN) Krian Friday Belik madah nya alai chukup manah bisi diatur Program Eksibisyen Ke-8, Karnival Pelajar enggau Kereja Pro-Dr (Projek of Dream Realized) ditu dikena meri penerang nyemetak ngagai mensia mayuh.
Tuju program nya dikena mantaika penerang pelajar enggau pengawa puang ngagai mensia mayuh lebih agi raban nembiak ke benung ngambi peresa perintah sereta peranak Saratok ke benung begigaka pengawa puang.
“Seriris enggau pengerembai revolusi industri 4.0 diatu, beguna amat kita milih kus tauka mata pelajar ke ulih dikena nangkup peminta industri.
“Nya alai, guna mih peluang (pogram Pro-Dr) tu endur ngulihka mayuh penerang ke diguna lebih agi ungkup semua kita ke deka nyapai juluk ati diri empu,” ku iya.
Friday ke mega Kaban Kaunsil Pengibun TEGAS madah munyi nya lebuh bejadika Karnival Pelajar enggau Kereja Pro-Dr ba Diwan Rumah Dayak ditu, empai lama.
“Kitai ba nengeri Sarawak benung nyingkang ngagai sekeda sektor ekonomi baru.
“Sekeda ari nya udah diserungkai lalu kitai ngembuan asil nyadi asil ekonomi baru ke deka ditempa kitai nya begunaka pengelandik endur kitai nangkup enggau dikena nyikap diri masuk dunya kereja,” ku iya.
Berebak enggau nya, Friday muji raban TEGAS laban udah ngatur program nya enggau mujur matak mayuh ejensi ngambi bagi ke pemaik peranak Sarawak.
Sama bisi datai Residen Betong, Richard Michael Abu Nawas, Kunsil (S.A.O) Pelilih Saratok, Laga Kueh, Menijar Kanan TEGAS Fredick Kevin, bala tuai opis perintah, tuai raban bansa enggau ke bukai.-TVS
