KALAKA, 31 Julai: Tusun program dikena ngerichahka Regata Kalaka enggau Pesta Saratok 2023 nerima puji ari bala temuai enggau raban pedagang.
Siku temuai Tracy Norris, 23 ari Lawas, iya terubah iya meda pengerami lumba perau berasai gagit amat meda pengerichah pekit lumba perau nya.
“Ati aku chukup teperindang laban tu keterubah iya aku datai ke Saratok kitu meda Regata Kalaka tu.
“Aku datai ari Lawas datai kitu ketegal deka meda mayuh aktiviti ke bisi diatur nyerumba Pesta Saratok,” ku iya.
Udah nya siku agi temuai, Danny Wong, 21 ari Sibu mega sepenemu lalu ngarapka pengatur Pesta Saratok tauka Regata Kalaka dudi hari nambahka mayuh agi aktiviti dikena matak mayuh agi temuai datai.
“Mayuh orang datai meda Regata (Kalaka) taun tu. Nya manah amat ngelai pemaju pemujur menua tu.
“Mayuh barang bisi dijual mayuh nyamai alai milih lalu aku ngarapka menua Saratok udah tu lebih maju.
“Arapka dudi hari komiti pengerami ulih ngatur mayuh agi aktiviti ke manah baka Pekit Kumang awak ke mayuh agi orang datai kitu,” ku iya.
Pia mega, ba penemu siku pedagang krafjari ari Lubok Antu, Molly Penguang, 38 madah diri beresai betuah laban diberi peluang bedagang barang kraf nyerumba Pesta Saratok 2023.
“Timbal ari mensia mayuh lebih peranak Saratok beratika barang ke dijual kami baka kereban kitai Iban tu chukup manah.
“Sepanjai bulan udah bejual ditu timbal manah amat. Mayuh temuai ke datai bisi nya meli kraf ari aku baka Selampai, Baju Orang Ulu, Kain enggau Tanggu,” ku iya.
Sida madah munyi nya lebuh dirandau TVS ba taba Pesta Saratok ke mega endur ngemataka Regata Kalaka 2023 kemari.
Ungkup penerang, pengerami Pesta Saratok diatur sepengelama sebulan kenyau pun bulan Julai lalu udah ditutup enggau Regata Kalaka kemari.
Nitihka rikod, penatai temuai bisi ngulu Regata Kalaka bisi 30,000 iku taja baru iya diatur taun tu.-TVS
