KALAKA, 31 Julai: Tim lumba perau Todak Berjaya mai pulai perais mata duit sepenyampau RM15, 000 pengudah sida dipadu ngempu gelar Raja Sungai Krian nyerumba Regata Kalaka 2023.
Menijar tim Todak Berjaya, Nur Hazwani Kasdi madahka iya nadai ngadang tim Todak Berjaya ulih ngempu gelar Raja Sungai Krian nyerumba serak tu laban nemu tim bukai bela ngembuan pengelebih ke diri empu.
“Ati aku chukup gaga sereta enda ngadang ulih menang mayuh (kategori) tambah mega Todak Berjaya tu ukai bisi orang ngelala.
“Nyadi kami sigi enda nyangka mih semadi udah disebut nyadi champion sereta mayuh penyukung ngelar kami Raja Sungai.
“Saran nyadi champion endang bisi tang enda kelalu andal diri menang,” ku iya maya dirandau TVS pengudah pengawa madahka pemutus Regata Kalaka, kemari.
Ungkup penerang, penuduk lumur dua pekit lumba perau serak tu dipenggi tim Khazanah enggau perais mata duit sepenyampau RM8,000 lalu ba penuduk lumur tiga ke mai perais mata duit RM3,000 diempu tim Baracuda.
Semua perais ungkup bala pemenang udah disuaka Kaban Kunsil Nengeri (ADUN) Kalaka, Mohd Duri ba Panggau Besai Regata Kalaka 2023 di Tebing Sungai Krian. -TVS
