KALAKA, 30 Julai: Kelimpah dikena raban pedagang ngelakuka produk dagang dua pengerami ke diatur ditu baka Pesta Saratok enggau Regata Kalaka 2023 diperati ulih nyadi pelasar dikena nerenak penyerakup bansa.
Kaban Kunsil Nengeri (ADUN) Kalaka Mohammed Duri madah, ari pengawa begempuru
nya semangat penyerakup enggau bemain ukai semina ba sida ke nyereta pekit tang
mega mungkur peranak Saratok sereta temuai luar.
“Pekara ke pemadu besai reti nengah pengerami tu rayat kitai ulih begempuru enda ngira umur, bansa enggau penatai pengidup.
“Ambika chunto baka Pesta Saratok enggau Regata Kalaka entara program ke pemadu besai ba pengerami serak tu (Pesta Saratok) dikena ngetan lalu nerenak semangat beserakup.
“Pekara tu nyata dipeda ukai semina ba sida ke nyereta pekit lumba tang mega nyengkaum temuai luar ke bisi datai ke Saratok,” ku iya.
Mohd Duri madah munyi nya lebuh bejadika Regata Kalaka 2023 ba Panggau Besai Regata Kalaka 2023 kemari.
Nangkan ke nya, ku Mohd Duri nengah pengerami nya mega sida ke bedagang bepeluang nyungkak penatai pemisi diri.
“Pemanah bisi pengerami tu mega kitai meda bala pedagang nyungkak ke penatai pemisi ruang bilik sida,” ku iya.
Ungkup penemu, Regata Kalaka 2023 diatur berengkah 28 nyentuk 30 Julai.
Sama bisi datai maya pengerami nya ADUN Krian, Friday Belik enggau bini iya Ani Isek, Residen Betong Richard Michael Abu Nawas, Pegawai Pelilih Saratok Haron Mahidi, Tuai Polis Pelilih (IPD) Saratok Mordani Tanin, Tuai Balai Bomba Saratok Putera Ila enggau ke bukai.-TVS
