BETONG, 29 Julai: Semua kaban Gerempung Besai Raban Nembiak Sarawak (SABERKAS) diperansang terus bekerejasama enggau pangan diri dalam mantu nentuka pemansang di nengeri tu.
Sapit Menteri Nembiak, Lumba enggau Main sereta Pedagang Sarawak, Dato Gerald Rentap Jabu madah, bala kaban SABERKAS mega deka terus dilatih mekuhka pengawa dagang chara baru ngambika sida ulih nyadi chunto nembiak bukai.
“Semua kaban SABERKAS patut besaup nyadi siti raban nentuka pemansang nengeri tu enda ngira ari sukut volunterism enggau penyiru.
“Kebuah pia laban kitai (SABERKAS) tu mih gerempung nembiak pemadu besai ba Malaysia mengkang nerima sukung taja udah 50 taun direjister,” ku iya.
Rentap Mega Kaban Kunsil Nengeri (ADUN) Layar madah madah munyi nya maya ngarika Menteri Nembiak, Lumba enggau Main sereta Pedagang Sarawak Dato Seri Abdul Karim Rahman Hamzah Nutup Program Bengkel Pemerkasaan Digital Ekonomi Saberkas Zon Selatan 2 ba sebuah hotel tebilang ditu, kemari.
Nangkan ke nya, ku Rentap bala kaban SABERKAS deka terus dilatih mekuhka pengawa dagang nitihka chara baru.
“Kitai deka meda orang ke nyadi tuai diatu bisi orang nganti lalu program ke diatur diatu mega mengkang tauka seruran dipejalaika.
“Nya alai, SABERKAS terus chakah ngelatih raban nembiak mekuhka pengawa dagang chara baru,” ku tandu iya.
Ku terang Rentap, ba semua bagi menua di Sarawak udah disediaka palan alai ngelatih raban nembiak bedagang nengah inkubator enggau ke bukai.
“Ambika chunto di Betong udah bisi Palan Hub Digital enggau Centexs endur narak penemu raban nembiak senentang chara ngemansangka sosio ekonomi,” ku iya.
Program sepanjai hari nya dipasuk 50 iku kaban SABERKAS ari pampang Saribas, Kabong, Layar, Engkilili enggau Batang Ai kelimpah sekeda penyereta khas ari Politeknik Betong, Centexs Betong enggau Kolej Komuniti Betong.
Sama bisi datai Kaban Kunsil Nengeri (ADUN) Lingga Dayang Noorazah Awang Sohor, Sekretari Politik ba Opis Premier Sarawak ke mega Mandal Presiden SABERKAS Sarawak Abang Abdul Aziz Datuk Dr Abang Abdul Rauf, Residen Betong Richard Michael Abu Nawas enggau ke bukai.-TVS
