PAKAN, 29 Julai: Siku orang tuai asal ari Rumah Layang Ulu Nunggang ditu ke diripotka lenyau pengudah nurun ngupa pantu pukul 8 pagi Hari Lima udah ditemu raban SAR (orang rumah panjai) ba kebun sawit.
Nitihka penerang ari Balai Bomba enggau Penyah Penusah (BBP) Bintangor, tudah Ajai anak Dana, 69 ditemu sida serumah urung 1 kilometer penyauh ari jalai besai kira pukul 2.15 ngalihari tadi.
“Tudah ditemu gerai sereta nadai sebarang bakal.
“Udah nya, iya dibai sida serumah pulai ke rumah ngena motosikal sereta dianjung sida sebilik beperesa pengerai ngagai Klinik Pengerai Pakan,” ku penerang ari BBP Bintangor sehari tu tadi.
Sebedau tu, tudah Ajai diripotka anak iya lenyau ba Balai Polis Julau pengudah ti nadai pulai ke rumah nyentuk pukul 8 malam Hari Lima.
Peranak Rumah Layang bisi bejalaika pengawa ngiga Ajai ba kandang endur iya ke ngupa pantu tang nyentuk pukul 3 pagi pengawa sida begigaka tudah puntan.
Bekau ari nya, operasyen ngiga Ajai terus dipejalai nengah saup ejensi ke bekaul sereta peranak rumah panjai nyentukka iya mujur ditemu pukul 2.15 ngalihari tadi.-TVS
