MIRI, 29 Julai: Premier Sarawak, Datuk Patinggi Tan Sri Abang Johari Tun Openg dipelaba deka bejadika Regata Baram 2023 kena 30 September tu.
Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil madah, lumba ai nya deka diatur pengelama empat hari berengkah 28 September nyentuk 1 Oktober.
“Ninting malam kitai deka ngatur pengawa mandangka main asal enggau panggau pemerindang ba pasar Marudi, Ratu Baram enggau Juara Bintang Regata Baram,” ku iya maya aum pemberita Baram Regata 2023 Marudi ba Opis Residen Bagi Menua Miri, kemari.
Ku iya, Trofi Premier Lumba Perau bela bisi diatur ditangkan bemacham main bukai baka perau kuasa besai, lumba perau kontrol enggau perau berias.
Penguang ke mega Kaban Kunsil Nengeri (ADUN) Marudi madah penyereta Lumba Perau diatur dua kategori iya nya semina ungkup peranak Baram aja enggau kategori tebuka ngagai mensia mayuh kelimpah Trofi Raja Baram ti nyendiaka perais mata duit RM10,000 ungkup gelar champion.
Berebak enggau nya, Penguang nesau peminat lumba nya sama nguji masuk Regata Baram nyengkaum peranak Brunei Darussalam.-TVS
