BARIO, 28 Julai: Kelabit siti ari etnik ti pintar di dunya. Komuniti tu iya nya sebuah komuniti ba baruh etnik Orang Ulu Sarawak.
Komuniti tu diau ba tanah tinggi Bario, Miri Sarawak lalu baka komuniti bukai mega Kelabit ngembuan penyelai adat enggau main asal.
Siku pinchin pengajar, Stanley Isaac Ibuh madahka sida ke diau di rumah panjai Ulung Palang suah ngayanka tanda asal enggau main komuniti Kelabit dikena nyambut penatai temuai seruran dipandang nyadika tanda pengaga ati sida nerima penatai temuai nya lalu adat tu meruan nyentuk ke sehari tu.
“Enti kitai meda budaya enggau komuniti Kelabit endang mayuh tang diatu ke agi mengkang nya keterubah iya, tanda asal bagi orang indu.Kelimpah ari nya sida ke lelaki pan bisi lalu sida ke lelaki deka ngayanka tanda ti dikumbai tanda bujang berani. Nyadi sida begunaka kereban baka ilang, terabai, topi tang diatu sida bisi moden mimit,” ku iya madah.
Kelimpah ari nya temuai ke datai mega dipinta begulai enggau komuniti di rumah panjai ngambika sama betanda sereta bemain aktiviti tradisional sida.
“Main bisi mayuh bengkah main tang iya ti meruan nyentuk ke diatu iya nya ‘Upun Alung”.Tu digaga orang indu aja. Sida nyembi padi, nganti padi nya kering sida lalu bemain ba dia.Tu bagi orang indu. Nyadi enti sida ngagai rumah panjai sida lalu ngajar sida ke lelaki.
“Kelimpah ari nya mega bisi main musinka pirin. Enti ulih ditangkap nya manah tang enti enda bisi kena ukum baka diasuh betanda, belagu tauka ke bukai. Tu siti tradisyen ke mengkang nyentuk ke diatu, “ku iya madah lebuh dirandau pemberita TVS bedau lama ke udah.
Stanley ke beumur 75 taun madahka dikena ngetanka main asal tu dia bala tuai komuniti patut megai tanggung pengawa ke chukup beguna ngambika nembiak rebak baru ngelala asal penatai sida.
“Tuai-tuai komuniti patut madahka ngagai raban nembiak ngambika budaya kitai meruan nyentuk ke jemah ila lalu kami nguji senaka ulih deka ngidupka budaya ke bisi,” ku iya.
Iya munyi nya lebuh dirandau pemberita TVS lebuh pengawa nemuai Sarawak Product Experience di Bario, Sarawak.
