SARATOK, 28 Julai: Kaban Kunsil Nengeri (ADUN) Krian Friday Belik nyukung penuh pemutus perintah Sarawak ti deka nyendiaka kus ngaul sempekat Malaysia (MA63) ba Universiti Teknologi Swinburne.
Ku iya pemutus nya atur ke chukup manah ngambika rebak baru ulih belajar lalu nemu enggau lebih silik pasal isi pekara ke udah dipekat dalam MA63.
“Pemutus Perintah Sarawak ti deka ngemasukka MA63 nyadi siti ari kus dipelajar ba renggat bachelor degree nya siti pemutus ke pemadu manah.
“Taja pia laban kitai apin nemu silik pasal pekara digaga tauka dipasuk ke dalam kus nya.
“Tang ba penemu aku pemutus nya manah awak ke meri peluang ngagai rebak baru belajar lalu nemu nama pekara ke udah dipekat dalam MA63,” ku iya.
Friday madah munyi nya lebuh dipinta meri timbal bekaul enggau pemutus Premier Sarawak Datuk Patinggi Tan Sri Abang Johari Tun Openg ti deka kus Sempekat Malaysia (MA63) dipasuk dalam Program Pelajar Universiti Teknologi Swinburne maya Aum Kaunsil Universiti Teknologi Swinburne Sarawak ke-36 sebedau tu.
Nangkan ke nya, Friday madahka nengah pemutus nya mega ngambika rebak baru ulih ngelala bagi hak ungkup anak Sarawak.
“Awak ke rebak baru tu meda nama utai ke bebendar ditegi kenyau ari suba-suba nyentuk ke diatu.
“MA63 tu siti ari pekara ke besai reti. Perintah Sarawak naka ulih nagih hak kitai pulai baru baka ke udah dipekat sebedau tu,” ku iya.
Udah nya, Friday arapka kus nya nerima sambut ke manah ari nembiak rebak baru ke pemaik nengeri tu empu dudi hari.
“Kitai ngarapka nembiak rebak baru lebih agi sida ke milih belajarka undang-undang ba renggat bachelor degree berati manah pekara ke udah dipekat nya.
“Pengudah nemu hak kitai (Sarawak) dalam MA63 dia kitai deka ulih nerang ngagai mensia mayuh,” ku iya.-TVS
