KUCHING, 28 Julai: Sarawak nyambut manah pengawa ngelancharka Pelin Kuing Tuju Ngalih Kuasa Menua (NETR) Begian Keterubah ke mega siri rapat dikena mutarka ubah klimet ke nyadi kemaya hari tu.
Sapit Menteri Kuasa enggau Pemeruan Rampa Menua Sarawak, Dr Hazland Hipni madahka perintah Sarawak temegah laban bela ngemeratka kuasa ulih dikemaru nengah kuasa hidroelekterik, projek hidrogen gadung enggau nyimpan karbon.
“Saran enggau langkar kereja ti ditetapka dalam NETR senutuk enggau Strategi Pemansang Pasca COVID-19 (PCDS) 2030 sereta seriris enggau juluk perintah Sarawak ti deka nyadi nengeri maju dalam taun 2030,” ku iya madah nengah siti penerang lebuh Hari Lima.
Dr Hazland lebuh nerangka senentang industri karbon madahka perintah nengeri mega udah diberi Lisin Dagang Karbon enggau Nguna sereta Nyimpan Karbon (CCUS) maya bulan Mac taun tu.
“Perintah meransang lebih mayuh projek enggau insiatif dikena nyungkak pemayuh karbon ari Sarawak ngambika ulih dijual ba makit domestik enggau antarabansa,” tandu iya.
Berebak enggau nya, Sarawak benung baum deka ngurangka karbon dalam industri lokal enggau sistem kuasa di nengeri tu ke alai mantu ngurangka pemansut gis rumah gadung.
“Sarawak benung chakah ngemansangka Pelasar Ngalih Kuasa enggau Pelin Kuing Tuju Kuasa Begulai,” ku iya madah.
Pia mega, iya ngelaluka ejensi luar ti bisi ati deka bekerejasama enggau sarawak dalam industri kuasa beresi sereta nyukung penuh NETR begian kedua ti deka dilancharka ujung taun tu.
Lebuh Hari Tiga, Menteri Ekonomi Rafizi Ramli udah ngelancharka NETR Begian Keterubah ti mantaika 10 inisiatif penyungkak ti dikerembaika ke deka muka peluang meranak puku entara RM435 bilion nyentuk RM1.85 trilion manggai taun 2050.- TVS
