SARATOK, 28 Julai: Kaban Kunsil Nengeri (ADUN) Krian Friday Belik meransang rebak baru mesti meri perati lebih agi ngagai pelajar ba bidang pengelandik tauka ngaul teknologi.
Ku iya tu beduduk ari nengeri tu begunaka mayuh raban profesional tauka tebangkar dalam semua bidang manggai taun 2030.
“Tu mih utai diguna kitai lebih agi diatu nengeri Sarawak benung nuju status nengeri maju sereta bepenatai pemisi tingi ba taun 2030.
“Nya alai, Sarawak begunaka mayuh raban orang tebangkar sereta profesional ngambi ulih mantu nengeri tu ngalih ngagai ekonomi baru,” ku iya.
Friday madah munyi nya maya bejadika Program ‘Hari Kerjaya Dan Pendidikan’ diatur Opis Pelajar Pelilih (PPD) Saratok ba Diwan Sekula China (SJKC) Myn Syn, kemari.
Nangkan ke nya, Friday meransang rebak baru patut beambi ulih ari pemayuh institusyen pelajar tinggi (IPT) ke diempu perintah Sarawak empu ke bisi nyendiaka bemacham kus pengelandik.
“Dikena nyukung tuju besai nengeri Sarawak ngasilka modal mensia ti lati.
“Modal mensia ke efisyen, pandai sereta bepengelandik kitai Perintah Sarawak udah bisi Institusyen Pelajar Tingi (IPT) ke diempu kitai empu nengah Yayasan Sarawak,” ku iya.
Sama bisi datai Adun Kalaka Mohammed Duri, Tuai Pegawai Opis Pelajar Pelilih (PPD) Saratok Anis Madeli, Tuai Penulung Direktor Yayasan Sarawak Zamahari Haji Saidi enggau ke bukai.-TVS
