BETONG, 25 Julai: Perayat di Betong diperansang nguna manah peluang beduduk ari mayuh projek pemansang benung dikemujur dikena nyungkak ekonomi menua nya.
Sapit Premier Sarawak, Datuk Amar Douglas Uggah Embas madah rayat Betong mesti regas ngerebut peluang ekonomi nya ngambika sida enda tinggal pemansang enggau ulih nyadi chunto ngagai rayat menua bukai.
“Nya alai kitai enda tau enda berunding dalam nuju pemansang 2030.
“Aku sereta Kaban Parlimen (MP) Betong Dr Richard Rapu enggai meda rayat ditu tinggal pemansang tang patut lebih nyulut (ngemansangka ekonomi) tauka nyadi chunto ngagai orang menua bukai lebih agi menua pesisir,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya maya Pengawa Nyuaka Chek Projek Mit Menua Pesisir (MRP) ba Rumah Mendit Unsu di Penom Ulu Paku, apin lama ke udah.
Berebak enggau nya, Uggah ngelalau mensia mayuh patut terus meri kerejasama ngagai pengari rayat di menua nya.
“Ambika chunto baka kitai ke merau enti semina kami dua bekayuh tentu perau nya mudah rarat.
“Tang enti semua kitai ke dalam perau nya sama bekayuh deka tentu perau nya deka lebih laju, anang beteju-teju.
“Sapa ke landik bekayuh terus ke bekayuh. Sama mega baka kitai ke bumai, sekalika nebang, ngerachun enggau ke bukai mesti betulung ngambika semua pengawa nyadi lempung.
“Pia mega, baka ngelama tu naka kebuah kitai tegap sereta majak mansang laban kitai sama besukung pangan diri, kering ati sereta kering runding,” ku iya.
Nangkan ke nya, Uggah madah iya enggau MP Betong sempama baka orang ke nurun ngasu beburu begigaka jelu ngambika bisi dibagi ngagai mensia mayuh lalu pekara nya ulih dikalih ngagai pengawa pemansang ke benung digaga ba menua Betong.
Ungkup penemu, antara projek pemansang ekonomi ke udah dipejalaika di Betong ke diatu iya nya Projek Nupi Manuk, Bejait Baju Dabong enggau Produk Krafjari ke bukai.
Sama bisi datai bini Uggah, Datin Amar Dato Doreen Mayang, Kaban Parlimen Betong, Dr. Richard Rapu, Sekretari Politik Premier Sarawak, Roselind Mapong, bala penghulu enggau ke bukai.-TVS
