KUCHING, 26 Julai: Peminat robotik di nengeri tu diperansang ngambi bagi dalam Pekit Petrosains RBTX Challenge sebedau haribulan pekit tu ditutup kena 31 Julai tu.
Pekit nya ditumbuhka Petrosains, The Discovery Centre ti nyadi sebuah pelantar ngagai rama petronas dalam nengapka penemu ba bidang pelajar STEM (Sains, Teknologi, Injiniering enggau Matematik).
Nitihka penerang rasmi Petrosains, pekit nya diatur baru taun tu enggau ngemeranka elemen pemeruan sepemanjai achara nya diatur seraya dikena nambahka penemu enggau pemereti komuniti lebih agi rebak biak pasal pemansang ti meruan sereta inklusif.
“Kelimpah mantu nguasa pengelandik bepikir aras tinggi enggau penau inovasyen, pekit tu diatur dikena ngelatih bala nembiak sekula dalam bidang tempa tukuh, ngadu kod enggau latih sensor pemun dalam ngaga robot,” ku penerang nya.
Pekit tu betuju dikena narak penemu mensia mayuh pasal pengerembai jeman digital berindik ari teknologi moden baka robotik, artificial intelligence (AI) enggau IOT.
“Pekit tu nerima sukung ari Opis Menteri Pelajar Malaysia enggau entara kategori ke bisi dalam pekit tu iya nya Robo Sumo, Robo Tracer enggau Innovation,” ku iya.
Bagi kategori Robo Tracer (Junior), pesereta beumur entara 7 nyentuk 12 taun deka diuji ngaga robot ti ulih ngumpul enggau nyeliahka teda ke ulih diguna baru sereta teda ke enda ulih diguna baru ke dalam penyimpan uras komunal ti disediaka di taman mengeri.
Ungkup kategori Robo Tracer (Advance), pesereta beumur entara 13 nyentuk 17 taun patut ngaga robot ti ulih ngumpul enggau nusun barang ba endur ke udah ditetapka.
Nangkan ke nya, kategori Innovation (Open) ti dibuka ngagai pesereta lokal ke beumur 10 enggau ke atas fokus ngagai 7 juluk sdg ti dikemeratka PETRONAS.
Kategori Innovation (Junior), pesereta beumur entara 7 nyentuk 12 taun deka diberi pengawa mantaika buah penemu enggau chara mutar inovatif dalam ngaga prototaip nguna Microcontroller.
Kepenudi, bagi kategori Innovation (Advance) pesereta lokal enggau antarabansa ke beumur entara 13 nyentuk 17 taun deka dipinta mantaika buah penemu enggau chara mutar inovatif dalam ngaga prototaip Microcontroller Enggau Internet Of Things (IOT).
Barang sapa ti deka ngambi bagi dalam pekit tu, kita tau ngelawa Playsmart Kuching ba Pusat Sivik Kuching tauka ngagai laman web RBTX Challenge 2023 ungkup penerang ke silik.-TVS
