SARATOK, 22 Julai: Siku tuai raban bansa ari Saratok, Pemancha Thomas Lamit Lutik meransang mensia mayuh terus besaup enggau pangan diri ngemujurka agenda pemansang menua.
Pia mega ku iya, bala apai indai lebih agi di menua pesisir anang enda ngemeratka pemansang pelajar laban ari pemandai sekula nya mih kunchi lumur satu dikena ngatur pemansang menua dudi hari.
“Belabuh ari kitai menua Sarawak tu ke tau begulai enggau pangan diri nyadi orang ketuai nyamai endar ngaga program sereta pemansang.
“Baka nya mega sekula taja sekeda nya dipadah repuk tang nya ukai penanggul kitai enda nurun ke sekula.
“Kebuah pia laban pelajar sekula tu pekara lumur satu ba aku siku nadai lebih ari kitai bisi pelajar sekula baru ulih ngemansangka menua,” ku iya maya dirandau TVS apin lama ke udah.
Nangkan ke nya, Thomas madah semua pemansang ke dipeda kemaya hari tu kebendar berekat ari pemintar sida ke nyadi tuai enggau sida ke endang bisi pemandai ba sekula.
Nangkan ke nya, lebuh meri timbal bekaul enggau pemansang ke udah digaga Perintah Sarawak, dia
Penghulu Josephine Entira Sagai madah, jam kediatu chukup mayuh pemansang udah dikemujurka perintah lebih agi pemansang infrastruktur di menua pesisir.
“Kitai meda diatu Jalai Pan Borneo udah menyana kerita mega chukup mayuh peda aku enti dibanding enggau 20 tauka 30 taun ke udah.
“Nya alai asai ba aku meri besai terima kasih ngagai Perintah Sarawak laban udah bekenanas ngemajuka menua Sarawak.
“Diatu kami ba menua ulu mayuh udah datai jalai, ai sereta bekal karan mega bisi lalu nadai kebuah kitai ngumbai menua tu enda mansang,” ku iya.-TVS
