KUCHING, 22 Julai: Premier Sarawak, Datuk Patinggi Tan Sri Abang Johari Tun Openg mansutka jaku jamin raban tuai perintah Sarawak deka terus nagih hak dalam Sempekat Malaysia 1963 (MA63).
Ku iya, Ex-Kepala Menteri Sarawak, niang Pehin Sri Adenan Satem tauka Tok Nan udah bebendar nagih hak nengeri Sarawak.
Diatu semangat nya disan iya enggau bala tuai bukai ngambika hak nya ulih dikeamat.
“Tok Nan nadai begulai enggau kitai agi tang aku deka meri jamin iya nya pengawa nagih hak Sarawak ke udah lenyau deka diteruska nyentuk semua ungkup Sarawak dalam sempekat nya dibasa sereta dikeamatka.
“Aku deka meri terima kasih ngagai raban ketuai Perintah Penyerakup laban apin lama ke udah setuju mulaika ngagai Perintah Nengeri 52 lot tanah ke nadai dikemansang nyengkaum begunan Opis Pos Sarawak ti besejarah,” ku iya.
Abang Johari mansutka jaku nya maya Gempuru enggau Pengawa Bejalai Beraban Nyerumba Ngintu 60 Taun Sarawak Merdeka di Padang Merdeka Kuching, pagi tadi.
Tandu iya, sebedau tu nengah proses mulaika kuasa, Sarawak udah diberi kuasa ngemujurka projek beungkus RM50 juta ke baruh nengah Opis Kereja Raya (JKR) Sarawak sereta Opis Parit Enggau Entali Ai Sarawak seraya diaku nyadi Opis Teknikal.
Kelimpah ari nya, ku iya Sarawak mega udah mujur bisi pengari nyadi kaban kaunsil direktor Kaunsil Asil Dalam Nengeri (LHDN) seriris enggau ungkup dalam Pekara 112D Kunstitusyen Perintah Besai.-TVS
