BETONG, 21 Julai: Program Away Day ke diatur Serakup Indu Gensurai Layar (SIGL) chukup manah laban ulih mantu kaban serakup nya ngerembaika produk krafjari sida.
Chairperson SIGL, Helen Sunta Wringkye madah Program Away Day mega nyadika pelasar endur sida merambu bemacham program ti pulaika pemaik kaban serakup nya.
“Nyadi sehari tu kami bisi ngatur Program Away Day dikena kami begempuru lalu ngaduka langgur pengawa ti deka dikereja kami ba taun 2024 ila.
“Nyadi program tu mega dikena aku meransang bala indu kaban SIGL ke pemaik serakup enggau mega dikena ngangkatka nama rumah panjai kami,” ku iya.
Helen madah munyi nya ngagai TVS pengudah tembu Program Away Day diatur Serakup Indu Gensurai Layar (SIGL) ba Palan Agrocraft ditu, apin lama ke udah.
Nangkan ke nya, Helen madah SIGL benung chakah ngasilka produk tebun baka pua kumbu, selampai enggau ke bukai dikena nambahka penatai pemisi diri sebilik.
“Nyadi taun 2024 mayuh aktiviti diatur baka pengawa nusuk manik, nenun pua kumbu, nenun kain, nenun selampai enggau ke bukai,” ku iya.
Udah nya, Helen bisi ngelansa senentang peluang dagang produk tenun motif Iban ti ngembuan makit ke chukup manah lebih agi ba sukut rega ti tinggi.
“Peluang dagang produk motif Iban baka pua kukbun sigi manah ulih nyungkak penatai pemisi.
“Ambika banding, enti nuan meratika siku-siku orang ti ngena perengka Iban baka selampai, siti selampai nya enti rega iya RM400 siti, nyema sepintu bilik bisi lima iku enti sida bela meli, berapa nya dalam sebulan aja?
“Dipeda aku, bisi endar penyampau rega nya dikena nambahka penatai pemisi sereta ngemansangka ekonomi kitai ari produk tenun nya tadi,” ku iya.
Ungkup penerang, SIGL ditumbuhka ba taun 1990 lalu diati bisi 12 iku komiti.
Berebak enggau nya, SIGL bisi perambu deka nempa kerejasama enggau Ranee Artisan Gallery ke diempu bini Kaban Kunsil Nengeri (ADUN) Layar, iya nya Datin Rosemarie Wong.-TVS
