SARATOK, 14 Julai: Raban pengereja pengawa perintah lebih agi di pelilih Saratok nerima manah langgur perintah besai ti deka nyerenih baru Skim Gaji Gawa Perintah baka ke udah dipadahka Menteri Besai Datuk Seri Anwar Ibrahim sebedau tu.
Siku pengajar, Muhammad Ariff Norudin madah kelimpah berasai gaga iya mega arapka pengawa ngadu baru Skim Gaji Gawa Perintah di menua tu ulih dikemujur ke enggau manah.
“Nyaut senentang langgur perintah ti deka nyerenih baru Skim Gaji tu aku nerima manah langgur nya lalu ngarapka pekara nya ulih dikemujurka enggau manah.
“Aku sigi gaga ninga berita baka nya,” ku iya.
Udah nya siku agi pengajar, Francis Juing Kadat madah pekara nya endang patut diserenih baru ngambi setipak enggau tanggungpengawa ke dipangku pengereja pengawa perintah ke majak mayuh tauka mar kemaya hari tu.
“Aku endang setuju amat enggau pengawa perintah ti deka meda baru Skim Gaji Gawa Perintah di menua tu.
“Tu beguna amat dikena nentu ke pengereja pengawa perintah di menua bulih gaji ke setipak enggau tanggungpengawa ke majak mar jam ke diatu,” ku tandu iya.
Arif enggau Francis mansutka timbal nya maya dipinta TVS meri timbal bekaul enggau langgur perintah ti deka nyerenih baru Skim Gaji Gawa Perintah di menua tu apin lama.
Bepelasarka rikod, kepenudi Skim Gaji Gawa Perintah diperati iya nya taun 2013 maya agi dipegai Menteri Besai maya nya, Datuk Seri Najib Razak lalu penyampau gaji ditiki entara RM80 ngagai RM320.-TVS
