SARATOK, 12 Julai: Kaban Kunsil Nengeri (ADUN) Krian, Friday Belik madah Pesta Saratok diperambu deka diatur besai agi taun baru.
Ku Friday, konsep Pesta Saratok kebendar lebih kurang sebaka enggau Pengerami Pemakai enggau Seni Betong (BeFa) 2023 betuju dikena mantaika penyelai pemakai sereta budaya komuniti di nengeri tu.
Ba awak ke sama, ku iya program tu ulih nyadika pelasar dikena raban pedagang mit nyungkak penatai pemisi diri.
“Kebendar iya kitai pan udah bisi program baka BeFa ke benung bejalai diatu iya nya Pesta Saratok.
“Konsep iya lebih kurang sama betuju meri peluang ngagai raban pedagang mit bejual produk pemakai enggau krafjari dikena nyungkak penatai pemisi sida,” ku iya.
Friday madah munyi nya pengudah bejadi lalu Nutup Pekit Main Catur Kaunsil Lumba Sekula (MSS) Bagi Menua Betong ba Sekula Primari (SK) St. Paul Roban, ditu kemari.
Nangkan ke nya, Friday madah Pesta Saratok deka dikemanahka agi udah tu nengah kerejasama iya enggau ADUN Kalaka, Mohd Duri.
Ngelansa pasal program sehari nya, Friday bisi ngagihka belanja sepenyampau RM20,000 ngagai Kaunsil Kepala Pengajar Bagi Menua Saratok dikena sida ngatur aktiviti sepanjai taun.
Ungkup penemu, Pekit Main Chatur nya diatur dikena milih pengari datai ari lapan zon ti deka ngarika MSS Betong bepekit ba renggat nengeri Sarawak ti deka diatur ba Serian berengkah 13 nyentuk 18 Ogos 2023.-TVS
