BETONG, 12 Julai: Pengaku ari Bank Dunya bekaul enggau Sarawak udah nyapai status nengeri bepenatai pemisi tinggi nyadi bukti nengeri tu udah maju ari sukut ekonomi.
Menteri Pemansang Indu, Ruang Bilik enggau Komuniti Dato’ Sri Nancy Shukri madah diri meri sukung ngagai penerang ke dibantaika raban Bank Dunya nya.
Ku iya, tu berindik ari aktiviti ekonomi di sarawak jam kediatu jauh udah manah ditambahka enggau pemayuh orang ari menua luar datai ngatur bemacham program besai.
“Aku sigi nyukung amat pekara ke udah dipadahka raban Bank Dunya laban sida udah bejalaika pansik enggau meda kediri baka ni pendiau Sarawak.
“Ba penemu aku tu chukup senutuk amat ngaku Sarawak nyadi sebuah nengeri ke bepenatai pemisi tinggi laban chukup berupai bukti Sarawak jauh maju ari sukut ekonomi enti dibanding enggau nengeri bukai,” ku iya.
Nancy madah munyi nya maya dirandau raban pemberita pengudah tembu Program Wanita Bangkit diatur ditu, apin lama ke udah.
Nangkan ke nya, ku Nancy bekau ari aktiviti ekonomi ke mayuh nya mega ngujungka pemeranak puku ari menua luar datai ngatur program ke besai di Sarawak.
“Nya kebuah mayuh orang luar datai ke Sarawak ngatur program betikas entarabansa baka konvensyen enggau ke bukai.
“Pengawa tu deka nyungkak agi nyungkak ekonomi rayat Sarawak laban enti mayuh program baka tu iya deka ngaul mayuh aktiviti ekonomi sereta meri penguntung ngagai hotel-hotel (pedagang).
“Nyadi semua kitai berasai temegah taja pekara tu diaku raban orang luar laban saran kitai enti nitihka nyapai status nengeri bepenatai pemisi tinggi 2030,” ku iya seraya madah Sarawak udah ba menasan ke betul. -TVS
