BAU, 9 Julai: Perintah Sarawak ngeletak dua pekara besai sebedau sebarang atur ngempu penuh MASwings ngambika nyadi serikat penerebai bilun butik Sarawak.
Premier Sarawak, Datuk Patinggi Abang Johari Tun Openg madah, dua pekara nya nyengkaum serikat nya mesti nadai ditating sebarang utang ke ulih ngeruga belanja lalu udah nya mesti dikemendar bejalaika servis penerebai bilun ngagai menua serantau.
“Enti semina ba Borneo dini asi, kitai deka terebai ngagai sitak menua serantau baka penerebai Kuching-Bangkok, Kuching-Jakarta, Kuching-Singapore tauka Kuching-Hong Kong.
“Nya patut bisi kaul terus enggau nya kebuah aku madah, kitai patut ngembuan serikat penerai bilun butik kitai empu,” ku iya.
Abang Johari ke mega Menteri Pekara Wang enggau Ekonomi Baru mansutka jaku nya rambau ba Pengerami Karnival Gawai Redeems 2023 ditu, malam tadi.
Ku iya mega, kelimpah nentuka pemeranak puku ulih pulai puku, serikat nya mega diengkah ngambika lebih kompetitif seikas enggau serikat penerebai bilun ke udah bisi lalu beoperasyen ba sitak serantau.
Taja pia ku iya, semua pekara nya enda ngeruga tuju asal penumbuh serikat penerebai bilun butik ti deka nentuka penegap rega tikit bilun ke Sarawak tauka pansut ari Sarawak lebih agi maya musin pengerami.
Situasyen nya ukai semina ulih ngurangka pengirau ati rayat ti deka pulai ke menua maya pengerami, tang mega mantu mutarka isu rega tikit bilun niki maya semak musin pengerami.
Sama bisi ngulu pengerami nya Menteri Dagang Temuai, Industri Kreatif enggau Seni Pemerindang Sarawak Dato Seri Abdul Karim Rahman Hamzah, Sapit Menteri Dagang Temuai, Industri Kreatof enggau Seni Pemerindang Datuk Snowdan Lawan, Sapit Menteri Pengangkut Dato Henry Harry Jinep, Presiden Redeems Datuk Peter Nansian Ngusie enggau ke bukai.-TVS
