SELANGAU, 2 Julai: Barang sapa ke bisi juluk mangku pengawa nyadi tuai rumah enda tau enda bisi pelajar ngambika ulih ngereja bemacham pengawa seriris enggau arus pemansang dunya moden.
Kaban Dewan Negara Senator Dato Dr Nuing Jeluing madahka sida mega abis nadai nemu macha, nulis enggau bekenaka telefon pintar.
“Sida mesti nemu ngena aplikasyen WhatsApp dalam telefon pintar laban nya siti pelasar ke suah dikena bekunsika penerang enggau berandau enggau pangan diri,” ku iya madah rambau pengerami Ngiling Bidai Sungai Bawang 2023 ti diatur ba Dewan Mayuh Guna Sungai Bawang, kemari.
Nangkan ke nya, iya nerangka tuai rumah mega mesti diau ba rumah panjai nya empu enggau enda ulih mendam ba endur bukai.
Dalam program ke sama, Dr Nuing madahka pasal pengawa nyiri penghulu baru ti ngaul endur ba Sungai Bawang, Sungai Tau enggau Kemena agi tepagang.
Kelimpah ari nya, iya ngelalau pengempu tanah ti deka ngemansangka tanah sida alai nanam kelapa sawit begulai enggau kompeni estet mesti macha silik dulu penetap ke diberi ngagai sida.
“Pekara tu chukup beguna enggau mesti diberi perati dikena nyeliahka penanggul ti tau nyadi dudi hari, “ ku iya.
Pengerami Ngiling Bidai Sungai Bawang 2023 nya digulu perayat ke datai ari Sungai Anak, Arip, Bawang, Tau, Kemena, Pelugau, Sungai Anus sereta Lubuk Bukut ti bela ngerichahka program nya ke nyadi kelai pengabis Gawai Dayak ti diintu pengelama sebulan.-TVS
