KUCHING, 1 Julai: Sarawak diatu benung chakah bejalaika Pansik enggau Pemansang (R&D) mansutka pemakai enggau pengawa betanam betupi ungkup tuju ngasilka produk bekualiti.
Premier Sarawak Datuk Patinggi Tan Sri Abang Johari Tun Openg madah, dikena nyapai juluk nya, Sarawak patut nyerungkai teknologi baru dikenamansutka pemakai enggau ngasilka pemakai ti bekualiti enggau negapka jamin pengelikun pemakai.
“Diatu aku benung mantu Universiti Putra Malaysia (UPM) Bintulu.
“Aku meri sida belanja dikena nyerungkai teknologi baru pasal pemakai enggau lumur dua iya nya pengawa betupi.
“Manuk tupi kelalu mayuh mega nyadi penanggul, rega majak niki. Tang penanggul kitai (Sarawak) iya nya kitai ngimpot pemakai jelu,” ku iya.
Iya madah munyi nya maya Pengerami Ngiling Bidai Gawai Dayak diatur Opis Menteri Industri Pemakai, Komoditi Enggau Pemansang Wilayah (MFICORD) Sarawak ba rumah menteri ke nguasa opis menteri nya Dato Sri Dr Stephen Rundi Utom ditu, pagi tadi.
Nerang silik, Abang Johari madah nya mega deka nyungkak produktiviti ekonomi ke ulih negapka mata wang menua.
“Ungkup deka ngembuan alternatif pemakai jelu diri empu, aku udah minta Opis Bekuasa Pengintu enggau Penyaga Tanah Sarawak (SALCRA) ngasilka pemakai jelu ngambika enda kelalu bepanggai ngagai pemakai jelu import,” ku iya.-TVS
