DEBAK, 1 Julai: Penembu Saribas Agropark deka nyungkak pemansang industri bumai ba sitak nya dudi hari.
Kaban Kunsil Nengeri (ADUN) Saribas Mohamad Razi Sitam madah, kebuah pia laban atur Saribas Agropark nyaran ngagai dua pekara besai iya ngaul serikat antarabansa enggau dagang dalam menua.
Ku Razi, saran udah tu lebih ngagai pemansang tanah bedandang baka ke udah disediaka perintah.
Udah nya, pekara kedua lebih diberi perati iya nya ungkup orang bedaja ti bejual bemacham utai tanam ari kebun.
“Kitai merambu siti program Saribas Agropark ke nyaran ngagai bidang ekonomi lebih agi dalam sektir betanam betupi tauka industri bumai.
“Tu entara ke diasai tau meri pangka besai (pemansang menua).
“Projek tu dilempai ngagai jaga SCDA. SCDA udah nyiri konsultan enggau tukang pangatur pelin iya lalu kitai udah suah betemu berandau lalu udah tu ila kitai deka mantaika ngagai Opis Premier ngambika diperati enggau diberi pemendar,” ku iya.
Razi madah munyi nya maya diberi basa nerima menira Konvoi Dalam Menua Betong 2023 ke diatur nyerumba Pengerami Ngintu 60 Taun Sarawak Merdeka ditu, kemari.
Kelimpah ari nya, ku Razi penumbuh Saribas Agropark tu endang pengawa dikena nentuka sitak Saribas nguna penuh Padang Bilun Bebuling enti udah tembu ila dikena nyungkak ekonomi perayat ke diau besemak.
Udah nya, Razi ke mega Sapit Menteri Pemansang Indu, Anak Mit enggau Pengelantang Komuniti Sarawak bisi nerang pasal projek bukai ti deka digaga ba selampur DUN Saribas.-TVS
