BETONG, 26 Jun: Sapit Premier Sarawak, Datuk Amar Douglas Uggah Embas meransang mensia mayuh lebih agi rayat ke diau di Spaoh patut nemu ngerebut peluang ke bisi disediaka perintah nengah Strategi Pemansang Pasca COVID -19 2030 (PCDS 2030).
Ku iya, kerejasama entara bala ketuai chukup beguna dikena nentuka pengidup dudi hari lebih lantang.
“Kita (ketuai) patut bejalaika tanggungpengawa diri gawa begulai nentuka semua rayat bela ngasaika pengelantang ari pemansang ke bisi digaga perintah ba sitak tu.
“Nya mih tuju perintah dibaruh iring Premier Sarawak (Datuk Patinggi Tan Sri Abang Johari Tun Openg) nempa polisi Strategi Pemansang Pasca COVID-19 2030 (PCDS 2030) ngambika Sarawak ulih nyadi siti wilayh ke besai penatai pemisi.
“Rayat di Spaoh ditu mega anang tinggal ari orang (rebut peluang) awakka sama ngasaika pemaik,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya ba Pengerami Ngiling Bidai ke diatur di Spaoh ditu, kemari.
Berebak enggau nya, Uggah berasai gaga meda penatai mensia chukup mayuh ngulu pengerami nya lalu nya ngelai sukung ke chukup tegap ngagai iya di Bukit Saban.
Sama bisi datai iya nya Kaban Parlimen Betong, Dr Richard Rapu, Residen Betong, Michael Abu Nawas, Pemesai Pelilih Betong, Alfred Geling Ason enggau bala tuai raban bansa.-TVS
