KUCHING, 24 Jun: Perintah Sarawak mengkang ngeletak chas karan baka selama ungkup penguna di nengeri tu.
Premier Sarawak, Datuk Patinggi Tan Sri Abang Johari Tun Openg madah, pekara tu beduduk ari Sarawak ngembuan pengulih ari sukut energi ti ngujungka Sarawak ulih neruska atur nya.
“Mayuh deka niki ke rega karan tang kitai enda, kitai (Sarawak) agi nitihka rega lama.
“Enti rega karan tinggi, pemeranak puku enggai datai lalu enti rega karan tinggi, kunteriktor pan tusah deka mayar bil,” ku iya.
Abang Johari ke mega Menteri Pekara Wang enggau Ekonomi Baru madah munyi nya maya bejadika Pengerami Makai Lemai enggau Bejadika Aum Besai Ninting Taun Gerempung Kunteriktor Melayu Malaysia (PKMM) Pampang Nengeri Sarawak Ke-24 Taun 2023, ditu malam tadi.
Sama bisi datai Sapit Premier Sarawak, Datuk Amar Douglas Uggah Embas, Sapit Menteri Besai, Datuk Seri Fadillah Yusof enggau Sekretari Perintah Nengeri Sarawak, Datuk Amar Mohamad Abu Bakar Marzuki.
Nerang silik, iya madah kelimpah ari energi karan Sarawak mega ngembuan energi ti bepelasarka ai tauka hidro.
“Diatu kitai ngemansangka hidro kitai di Baleh.
“Udah Baleh kitai ngaga pemutus, kitai ngaga siti agi ba Trusan, Limbang. Reti nya ari sukut energi, Puji Tuhan kitai bisi,” ku iya. -TVS
