KUCHING, 25 Jun: Sitak Tabuan enggau kandang endur ke besemak deka ngasaika empas pemansang ari pengawa ngemansangka endur nya nyadi sitak metropolitan ungkup mengeri besai Kuching seriris enggau pemansang ke benung chakah dipejalaika.
Premier Sarawak Datuk Patinggi Tan Sri Abang Johari Tun Openg madah, pengawa ngemansangka sitak nya nyadi lebih muntang lebuh iya disediaka enggau servis Transit Pejalai Autonomi (ART) ti deka mansa kandang endur nya.
“Nengah pemisi perambu kitai ari sukut pemansang mengeri Kuching, tu deka nyadi sitak satelit.
“Pemansang nya benung chakah dipejalaika nuju ke Samarahan. Nya kebuah, ART chukup beguna umba diatu kitai bisi penanggul trafik Samarahan-Kuching nyadi kitai patut bisi pemutar penanggul trafik,” ku iya.
Abang Johari mansutka penerang nya ngagai pemberita pengudah Pejalai Gawa Ngagai Palan Bebeli Barang Vivacity, ditu kemari.
Kelimpah ari nya, iya mega madah perintah Sarawak benung chakah bejalaika atur nengah chara ngaduka Sungai Tabuan dikena mutarka penanggul bah ke suah nuntung sitak ti ngembuan rega rumah ke chukup tinggi ba mengeri kuching.
“Nyadi Sungai Tabuan, nya deka diadu manah dikena mutarka penanggul bah awakka ai bejalai enggau lanchar lalu nadai agi bah nyadi ba endur nya.
“Kitai ditu bisi kandang rumah ke ngembuan rega ke tinggi, nyadi Kuching dalam taun 2030 deka terus begempung enggau Samarahan lalu tu deka nyadi sitak maju.-TVS
