DEBAK, 25 Jun: Kaban Parlimen Betong, Dr Richard Rapu madah diri bela nyukung langgur penemu ti minta Perintah Sarawak patut numbuhka sebuah serikat telekomunikasyen diri empu ngambika penanggul senentang arus telekomunikasyen ulih diputar lengkas.
“Perambu minta numbuhka serikat telekomunikasyen endang siti utai ke manah.
“Tang taja pia kitai mega patut beratika penanggul menua kitai Sarawak tu chukup luas tang penyampau rayat ke nguan siti-siti endur baka ba menua pesisir nya agi kurang enti dibanding enggau mengeri.
“Nyadi pekara tu, nyangka ngujungka operator selular enggai nyendiaka servis telekomunikasyen ba tower ke udah disedia ketegal nadai tentu pulaika penguntung ke besai ngagai sida,” ku iya.
Dr Richard madah munyi nya ba sebengkah program ke diatur ditu, kemari lebuh dipinta meri timbal penemu ke dipansutka Kaban Kunsil Nengeri (ADUN) Baleh Nicholas Kudi Jantai ti ngansak perintah Sarawak patut numbuh ke sebuah serikat telekomunikasyen diri empu ngambika sebana rayat di menua pesisir pasal penanggul arus telekomunikasyen ulih teputar.
Nangkan ke nya, Dr Richard ngarapka perambu nya ulih dikemujur ke pemaik rayat Sarawak empu.
“Operator selular ba Malaysia tu bisi lima bengkah, nyadi enti Sarawak ulih minta lisin ulih ngaga siti telekomunikasyen operator selular ungkup Sarawak nya manah amat.
“Arapka pekara tu ulih dikemujurka perintah Sarawak ke pemaik rayat kitai di nengeri tu lebih agi rayat di menua pesisir.
“Aku sigi nyukung Sarawak ulih ngaga siti operator selular, ambika banding baka Maxis tang nya patut ari inisiatif perintah kitai (Sarawak) empu,” ku iya.
Dulu ari nya, Program Kaul Politik Sekretari Politik Ngagai Premier Sarawak bisi diatur ba Dewan Perpaduan Debak betuju meri licha sereta penerang ke nyemetak senentang inisiatif enggau pelin pemansang ke bisi dirintai dalam Strategi Pemansang Pasca Covid-19 2030 (PCDS 2030).-TVS
